Маны аах Уопсастыба

«Дьоллоохтор» тупсаҕай искибиэри туталлар



Горнай улууһун Бэрдьигэстээх сэлиэнньэтин дьаһалтата, бэрэстэбиитэллээх уорган дьокутааттара нэһилиэнньэ көхтөөх кыттыытын ситиһэр инниттэн 13 уопсастыбаннай сэбиэти (ТОС) тэрийбиттэрэ.

Сүрүн болҕомто олорор сир ыраас, тупсаҕай көстүүлээх буоларыгар ууруллубута. Бу туһунан Горнай улууһун землячествотын салайааччыта Надежда Фёдорова бу курдук кэпсиир:
«Бүгүҥҥү күҥҥэ «Дьоллоох» ТОС-ка дьон-сэргэ хото түмсэн, көхтөөх үлэ саҕаланна.
Түөлбэ салайааччыта Ахмет Федоров актыыбын түмэн, Манчаары оонньууларын көрсө уонна түөлбэлэригэр сынньанар, мустар, олорор сирдэригэр киирии аартыгар «Тапталлаах нэһилиэкпит — күөх дойду» диэн тупсаҕай искибиэр бырайыагын оҥорон, ону олоххо киллэрээри сыал-сорук туруорунан үлэлииллэр.
ТОС олохтоохторо төрөөбүт дойдуга бэриниилээх буолуу үтүө холобурун көрдөрөллөр.
Олохтоохтор көмөлөрүнэн бу күннэргэ искибиэр сирин-уотун тэҥнээн, түөлбэ олохтооҕо Николай Бельды салайар тэрилтэтэ кумах кутта. Түөлбэ олохтоохторо үтүө санаа аахсыйатын тэрийэн, 30 тыһ.солк хомуйдулар. Хомуллубут үбүнэн 2 т. куб былаахыны атыыластылар.Бырайыагы өйөөн, 2 тыһ. устуука «самореһынан» урбаанньыт Игорь Павлов көмөлөстө. Бырайыагы олоххо киллэриигэ тутууну сүрүннүүр маастарынан Егор Петров ананна. Искибиэргэ ыскамыайкалары туруоруохтара, сибэкки олордуохтара. Улуус төрүттэммитэ 90 сылын көрсө бэс ыйын 25 күнүгэр искибиэр тутуута түмүктэниэҕэ.
Биһиги, Дьокуускай куоракка олорор биир дойдулаахтар түмсүүлэрэ, ахта-саныы сылдьар төрөөбүт дойдубут тупса, киэркэйэ турарыттан, үтүө санаалаах, эдэр эрчимнээх олохтоохтор дойдубут тупсарын туһугар үлэлии сылдьалларыттан киэн туттабыт, махтанабыт.
Тапталлаах улууспут үүнэ-сайда турдун!». Хас биирдии тыа сирин нэһилиэгэр маннык хамсааһын үксүү турдун.

Елена ПОТОЦКАЯ, «Саха сирэ» хаһыат, edersaas.ru

2
0