Дьоллоох ыал тиэргэнниин ураты

Ааптар: 
Бөлөххө киир:

Бүгүҥҥү күҥҥэ оҕотугар олорор эдэр ийэ  Ольга Птицына «инстаграмыгар» 38,2 тыһ. сурутааччылаах.

edersaas.ru 

Икки кыра оҕолоох ийэ хайдах бокуой булан, бачча элбэх киһи болҕомтотун тардарын, киһи сөҕөр эрэ. Мин ордук Ольга тиэргэнин туһунан суруйарын, бэйэтэ олордор оҕуруотун аһыттан астыырын уонна кырачаан оҕолорун иитэр ньыматын сэргээн ааҕабын. Бүгүҥҥү кэпсэтиибит бу тиэмэлэр тула буолуоҕа.

Тиэргэн мусуойа

— Ольга, кэпсэтиибитин мин тиэргэн олбуоругар соһуйа көрбүт хартыыналарбыттан саҕалыах. Ити туох хартыыналарый?

— Дьиэҕэ олорору тутуһар эрэсиимҥэ олорон, оҕону иитиигэ бэртээхэй ньыманы тобуллубут. Улахан уолбутун (кини билигин 20 сааһа) олох оҕо эрдэҕиттэн кэрэҕэ, сырдыкка уһуйбуппут. Араас омук дойдуларыгар, Арассыыйа куораттарыгар бардахпытына, хайаан да түмэллэргэ сылдьааччыбыт. Ол курдук, Мадрид Прада мусуойугар, Сальвадор Дали, Ван Гог, Нуучча мусуойдарыгар сылдьыбыппыт. Оҕобут олох кыра сааһыттан ускуустубаны кэрэхсии улааппыта. Ол иһин кэргэмминээн кырачааннарбытыгар эмиэ оҕо саастарыттан кэрэни кэрэхсии үөрэнэллэригэр анаан олбуорбутугар Левитан, Шишкин, Айвазовскай курдук аатырбыт худуоһунньуктар баннер хартыыналарын ыйаабыппыт. Билигин кэлэ-бара сылдьан ыйыта сылдьар буолан, игирэлэрбит хартыынаны ааҕа билэллэр.

Оҕону иитии ньымалара

— Эн билигин дьиэҕэ олороруҥ быһыытынан, оҕолоргун наһаа үчүгэйдик үөрэтэр эбиккин. Дьонуҥ үөрэнэллэригэр өссө туспа эрэсиимнээхтэр быһыылаах дии?

— Кырачааннарбын төрүөхтэриттэн сахалыы үөрэтэбин. Улахан уолбутун, эдэр сылдьан, сахалыы үөрэтэр толкуй киирбэтэх. Өрүү нууччалыы кэпсэтэр этибит. Билигин эдэр киһи сахалыы өйдүүр эрээри, нууччалыы саҥарар. Ол иһин улахан сыыһаны оҥорбуппутун өйдөөн, игирэчээннэр төрөөбүт төрүт тылларын билиэхтээхтэр диэн санаанан салайтаран, уу сахалыы иитэбит.

Тоҕус ыйдарыттан саҕалаан, оҕону сайыннарар оонньуурдарынан оонньотобун. Наһаа сөбүлүүллэр. Анал эрэсииминэн күҥҥэ биир-балтараа чаас уруок курдук үлэ күнүгэр дьарыктанабыт. Өрөбүллэргэ сынньаналлар. Оскуолаҕа олорон үөрэнэр курдук дьарыктаналлар.

Ол кэми хайабыт да – кинилэр да, мин да наһаа сөбүлүүбүт. Бэл, хаһан ол «уруоктара» саҕаланарын кэтэһэр курдуктар – дьарыктанар чаастара чугаһаатар эрэ, илиибин-атахпын манаан бараллар. Санаабар: «Чэ, хаһан?» — диир курдуктар. Бэйэм да итинник кэмҥэ наһаа сынньанабын. Онно-манна сүүрбэттэр, эчэйбэттэр. Чуумпураллар, холкутуйаллар. Кылаабынайа, наһаа интэриэстээхтэр. Сорудахтарын хайаан да бүтэрэн баран, остуолтан тураллар. «Сылайдыбыт» диэбиттии, быраҕан баран сүүрэн хаалбаттар.  Аһылыкпыт эмиэ сахалыы. Кус, таба, убаһа, ынах этин талымастаабакка сииллэр. Тугу да сирбэттэр-талбаттар. Ийэлэрэ тугу иннилэригэр уурбутун бүтэрэн баран тураллар.

Оҕо иитиитиигэр дьиэ кыылын оруола

— Ити куурусса иитэргит олус туһалаах эбит ээ. Иккитин туола илик кыысчаан сымыыт хомуйа сылдьара – остуоруйаҕа тэҥнээх.

— Кэлэр сылга куруолук ииттэр санаалаахпыт. Кууруссаларбытын табаарыспытыгар кыһын кыылы иитэр пиэрмэҕэ биэриэхпит. Кини онно кууруссалары эмиэ иитэр эбит. Мин хайдах эрэ өлөрүөхпүн баҕарбат эбиппин. Эһиил көтөр фабрикатыттан саҥа кууруссалары атыылаһыахпыт.  Оҕолор кыратык улааттахтарына, өйдөннөхтөрүнэ ыт ылан биэриэхпит. Ыттаныан баҕарар саастара кэлиэҕэ. Төрөөбүт күннэригэр бэлэх оҥоруохпут.

Газон – ыал киэн туттуута

 — Дьиэҕитигэр кыһыннары-сайыннары олорор буоллаххыт?

— Бу чааһынай дьиэни туттан киирбиппит үһүс сыла. Бастаан дьиэбит иһин-таһын олохтоохтук оҥостубуппут. Онтон тиэргэммитигэр ылсыбыппыт. Анн бастаан, биллэн турар, тэпилииссэ туттубуппут. Онтон оҕуруоппутун оҥостубуппут. Ол кэнниттэн беседка туттубуппут. Оҕо былаһааккатын тутуу уочарата кэлбитэ.

Онтон быйыл күөх газон ыстыбыт. Бу биһиги ыал киэн туттуубут буолар. Аҕабыт сиэмэ ыһыахпыт иннинэ, сири-уотун ыраастаан баран, хара буор кутан, сирин бэлэмнээбитэ. Биир тэҥ буолуохтаах. «Овсяница красная» диэн сиэмэни илиибитинэн ыспыппыт. Онтон тыал көтүппэтин диэн анал матырыйаалынан сабан баран, уу куппуппут. Онон сиэмэбит араскы биэрэ сыппыта. Икки нэдиэлэ буолан баран, бүрүйбүт матырыйаалбытын ылбыппыт. Газон үүнүүтүн саҕана күҥҥэ иккитэ ууну кутуохха наада.

Ону көтүттүҥ да, сорох сиринэн кураанах миэстэ тахсыан сөп. Ол газон уопсай көрүҥүн, биллэн турар, буорту гынар. Уонна бастакы кэмҥэ олус элбэх сыыс от үүнэр. Ону ыраастыы сылдьыахха наада. Ити курдук, тиэргэммитигэр, оҕуруоппутугар үгүс сырабытын биэрэбит.

Оҕуруот аһыттан минньигэс салаат

— Эн наһаа минньигэстик астыыгын. Оҕуруот аһыттан биир ырысыапта сүбэлээ дуу.

— Бу салааты дьиэбит эр дьоно олус сөбүлүүллэр. Бастаан 300 гр убаһа этин ыһаарылаан бэлэмниибит. Онтон биир оҕурсууну, икки помидору кырбыыбыт. Эт да, оҕуруот аһа да «соломкалыы» кырбанар. Күөх тумаҕа укроп уонна петрушка наада. Үс ньуоска соевай соус, сахар, кориандр, биэрэс (харахпытынан көрөн холуйабыт) холбоон буккуйабыт. Онтон салаат сэбирдэҕин улахан тэриэлкэҕэ тэлгэтэ уурабыт. Онно салааппытын кутабыт. Көрөргүт курдук, ханнык да арыыны бу салаакка туттубаппыт.

… Ольга Птицынаны кытта киһи тиэмэҕэ кэпсэтэ олоруох курдук. Ол да иһин кини хас биирдии инстаграмҥа суруйуутун 15-тии тыһыынча киһи көрөр буоллаҕа. Холобура, Ольга ити оҕуруот аһын ырысыабын 15,4 тыһыынча киһи көрбүт! Төһөлөөх киһи бу салааты астаммытын сэрэйэҕин эрэ. Ааҕааччылар, эһиги эмиэ боруобалаан амсайыҥ.

Елена Потоцкая, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0