Култуура Маны аах Чараҥ

Долгуйуу долгунугар уйдарар ураты күҥҥэ

Бүгүн — ЫРЫА күнэ! Ырыа күннээҕи олохпутугар арахсыспат аргыспыт. Ырыа айааччы, ырыаһыт баар буоланнар олохпутун киэргэтэллэр, дууһабытын уоскуталлар. Ити эйгэни үөскэтэр дьоҥҥо ураты махтал!

ЫРЫАҺЫТ ДЬЫЛҔАТА

Ырыаһыт санаата ып-ыраас,
Ырыаһыт эйгэтэ чап-чараас,
Ырыаһыт олоҕо —
бу тулуур!
Ырыаһыт дьылҕата — бу дьулуур!

Ырыаһыт, ырыаны айааччы
Биир эйгэ дьонноро буолаллар,
Үйэлээх ырыаны бүөбэйдээн
Суруйуу, толоруу — бу талаан!

Истээччи быһаарар ырыаны
Ылланар, ылламмат дьылҕатын,
Ис турук ылыныа, ыллаһыа —
Ол аата ылланыа эн ырыаҥ.

Ырыа диэн дьикти күүс, сүдү күүс!
Ытыыртан, үөрүүттэн үөскээччи,
Дууһаны уоскутар, көтүтэр
Ураты эйгэлээх уйан күүс!

                                      Полина-Победа,
                                                Уус-Алдан.

 

Бүгүн оскуоланы бүтэрэр оҕолорбутугар ураты долгутуулаах  тиһэх чуораан күнэ! Учуутал, төрөппүт, оҕо бары тэҥҥэ үөрүүнү кытта долгуйуу долгунугар уйдарар күннэрэ.
Барыларыгар доруобуйаны, инникигэ эрэли, үгүс үөрүүнү баҕарабын.

ТИҺЭХ ЧУОРААН

Бастакы чуораанын тыаһатан
Ноотойо хаампыта оҕокком,
Бу бүгүн бүтэһик чуораана
Ол оҕом кулгааҕар чугдаарда.

Уон сылбыт ааспыта түргэниэн!
Улааппыт бадаҕа уолчааным
Оо, оттон ийэтин сүрэҕэр
Оҕокком билигин да оҕо дии.

Оскуола чуораанын иһиллээн
Таалаллар бу бүгүн сүрэхтэр:
Оҕоҕо, ийэҕэ, аҕаҕа,
Учуутал сүрэҕэр иҥэллэр.

Чуорааммыт чугдаара тырылаан
Көрсүһэр кыракый киһини,
Ол курдук чугдаара тырылаан
Атаарар улааппыт оҕотун.

Атаарар ыраахха угуйа
Киэҥ олох нэлэмэн суолугар
» Киһи буол! Дьоллоох буол!»- диэбиттии
Бу бүгүн ураты тыастаммыт.

Чугдаарыый, Чуорааммыт, чугдаарыый
Улааппыт оҕоҕун атаарыый —
Хас биирбит бастакы чуораана!
Хас биирбит бүтэһик чуораана!

                                                    Полина-Победа,
                                                    Уус-Алдан

Хартыыналар: aficha.ykt.ru,  youtube.com, yschool16.obrblag.info ылылыннылар

0
0