Дьол кустугун туттарбыт Олоҥхо Ыһыаҕа

Бөлөххө киир:

Дойдум аптаах салгынын дуоһуйа ыймахтаан, ахтар-саныыр дьоммунаан, бииргэ үөрэммит доҕотторбунаан көрсөн, Олоҥхо Ыһыаҕын туонатыгар Алгыс ылан, Бүлүү эбэ сүнньүттэн устан тахсар күнү көрсөн, Кэнтиккэ саха кутугар чугас рок-муусука бэстибээлин көрөн, дууһаны толорор эрчимиттэн үҥкүүлээн ылан, киһи киэн туттар идэлээх биир дойдулаахтарбын кытта билсэн, орой мэник саастарым ааспыт түөлбэбэр Бэрэҕэ сылдьан, олорбут подъезпар киирэн, оҕо сааһым сытын ылан уонна, биллэн турар, кырылас кумахтаах Бүлүүм биэрэгэр сахалыы алгыстаах арыылаах алаадьынан күндүлээн, дьол быатын бигэтик туттум.

Дойдум дьонун ыллаан эрэрдии унаарытар саҥата истиэххэ бу үчүгэйин! Мин наар түөс муҥунан тыына, харах ыларынан көрө, дуоһуйа сырыттым.
Саха норуота таптыыр бэйиэтэ Бүөтүр Тобуруокап түмэлин уһаайбатыгар сылдьан олус диэн астынным. Өйдүүбүн бу дьиэни. Улахан бэйиэти мин оччолорго олох кыра киһи үрүҥ маайкалаах сылдьарын элбэхтик көрбүтүм, кини мин аҕам Константин Петрович Шадрин чугас доҕоро этэ. Биһиэхэ наар киирэрэ, аҕабынаан кэпсэтэ олорор саҥалара дууһам түгэҕэр сөҥөн хаалбыта бу уһаайбаҕа киирбиппэр тиллэн кэлбиккэ дылы буоллулар.

Кинилэр маллара, таҥастара, кинигэлэрэ элбэҕи санаттылар. “Эдэр коммунистка” (»Сахаадаҕа») бииргэ үлэлии сылдьыбыт, хаһыаппытыгар фотокордаабыт Петр Тобуроков (сиэнэ) хоһугар киирэн Петяны санааммын хараастан ыллым. Манна кини наар сөбүлээн кэтэр сэлиэччигэ, туттубут фотоаппараттара ууруллан, элбэҕи кэпсээн тураллар.

Ботуогурап идэтигэр аҕата уһуйбута. Бу олорон оҕо сааһым баар-суох хаачыстыбалаах хаартыскаларын Дмитрий Федосеевич Наумов, билэргит курдук, Тобуруокап күтүөтэ, биллэр суруйааччы, түһэрэн, бэчээттээн биэрбитэ. Оччолорго биһиги Бэрэҕэ ыаллыы олорбуппут. Ол хаартыскаттан муҥутуурдук киэргэнэн, оскуола пуорматын үрүҥ баартыгын кытта кэппит маҥнайгы кылаас үөрэнээччитэ Айта Шадрина мичээрдээн көрөн олорор, аттыбар тапталлаах ийэм Валентина-Мария Андреевна Багдасаева, эдьиийим Валя, балтым Надя бааллар. Дьоллоох оҕо саас буолуоҕун аҕабыт барбытын кэннэ биир сыл буолан баран…


Нам Тобуруокап тыынынан толору. Махтанабын биһиэхэ, маҥнайгы көрөөччүлэригэр өссө сибиэһэй кырааска сыттаах, олус ыраастык сууллубут, уурбут-туппут курдук кичэллээхтик оҥоһуллубут баай архыып докумуоннарын сиһилии билиһиннэрбит түмэл үлэһиттэригэр: пуонданы харайааччы Иван Егорович Чычаховка, экскурсоводтар Галина Павловна Саввиноваҕа, Марина Такасаевна Петроваҕа уонна Ярославскай аатынан мусуой методиһа Туйаара Валентиновна Ивановаҕа.
Кииним түспүт бөһүөлэгин устун оҕо сааһым дьүөгэтинээн Алексеева Леналыын сатыы хааман, билиҥҥи сайдыытын, тутууларын көрөн үөрдүбүт. Аныгы саха дэриэбинэтэ киһи эрэ кутун тутар.


Оскуоланы бүтэрбиппит быйыл хайы-сах 40 сыла. Эмиэ да элбэх, эмиэ да бүппэт тыыннаах бүтүн олох кээмэйигэр кылгас кэм диэтэҕиҥ. Олоҥхо Ыһыаҕа буолан, бииргэ үөрэммит оҕолорбут бары түбүк үөһүгэр буоланнар, элбэх буолан сугулааннаабатарбыт да, ордук ахтыһааччылар син быыс булан көрүстүбүт, самаан сайын үрүҥ түүнүгэр эбэбит кытылыгар күнү көрүстүбүт, оскуолатааҕы сылларбытын санаан үөрдүбүт-көттүбүт.

Үөрэммит икки мэндиэмэннээх үрүҥ испиэскэнэн ыраахтан сандааран көстөр Хотун Бүлүү пааматынньык кэтэҕэр турбут «восьмилеткабын», Бараахап аатын сүгэр эргэ мас оскуолабын олус да ахтабын. Хомойуох иһин, билигин оскуолатааҕы сылларбыт туоһулара буолар дьиэлэрбит суохтар, олох хаамыытынан саҥа таас оскуола буолан тураллар. Оттон мин оскуолаларым сүүрбэһис үйэҕэ хааллахтара…
Сүрэҕим-быарым сымнаан, тыыным уһаан, туругум тупсан ахан эргилинним тапталлаах Үөһээ Бүлүүбүттэн. Махтанабын дьол кустугун туттарбыт Олоҥхо Ыһыаҕар!

«Саха сирэ» хаһыакка, edersaas.ru анаан Айталина НИКИФОРОВА-ШАДРИНА

+1
0
+1
0
+1
0
+1
0
+1
0
+1
0
+1
0