Бүгүн Дьокуускай куорат баһылыга Сардаана Авксентьева урбаанньыттары кытары көрүстэ. Дьыалабыай кэпсэтии түһүлгэтигэр куорат баһылыгын бастакы солбуйааччы Владимир Федоров, Координационнай сэбиэт чилиэннэрэ, дьоҕус уонна орто бизнес бэрэстэбиитэллэрэ кытыннылар.
Бу туһунан биһиэхэ Дьокуускай куорат уопсастыбаннаһы, иһитиннэрэр-биллэрэр маассабай сириэстибэлэри кытта үлэҕэ Департамена иһитиннэрдэ. Ол курдук, куорат баһылыга дьоҕус уонна орто бизнес Дьокуускай олоҕор-дьаһаҕар, социальнай, экономическай сайдыытыгар ураты суолталааҕын бэлиэтээтэ диэн суруйаллар.
—Көрсүһүүбүт сүрүн сыала-соруга — профессионаллар баҕаларын уонна сүбэлэрин истии. Дьоҕус уонна орто бизнес бэрэстэбиитэллэрэ олохтоох бүддьүөккэ бэйэлэрин кылааттарын киллэрсэллэрэ биллэр, сыл ахсын 2 миллиард солк.кэриҥэ киирэр. Биһиги бары бииргэ көмөлөөн предпринимателлэр үлэлэрин өйүүр миэрэлэри оҥорорбут наада. Олохтоох бизнеһи өйүүргэ, көмөлөһөргө, сыралаах үлэлэрин чэпчэтэргэ бэлэммит, — диэтэ мэр.
Урбаанньыттар көрсүһүүгэ көҥүлэ суох бизнеһи утары охсуһарга, суобаһа суох урбаанньыттар сиринэн туһаныыларын көрөргө, учаастагы биэрии дьэҥкэ буоларыгар, ону сэргэ 2016 сылтан сир уонна бэйэ бас билэр баайыгар-дуолугар нолуок үрдээһинин, о.д.а. сытыы боппуруостары таарыйдылар.
Атах тэпсэн олорон ирэ-хоро сэһэргэһии чаастан ордук ыытылынна. Олохтоох урбаанньыттар маннык көрсөн сэһэргэһии былааһы уонна бизнеһи хардарыта сибээстээх үлэлииллэригэр ситимниирин, чугаһатарын бэлиэтээтилэр, үлэ-хамнас сайдыаҕар эрэннилэр.
— Бүгүн бииргэ үлэлииргэ барыбытыгар уһулуччу кыах бэрилиннэ. Бары урбаанньыттары уонна Координационнай сэбиэти тапталлаах куораппыт сайдарын, тупсарын туһугар этиилэрин киллэрэллэригэр ыҥырабын. Биһиги эһигини кытары үлэлииргэ бэлэммит, оттон эһиги?, — диэтэ куорат баһылыгын бастакы солбуйааччы Владимир Федоров.
Түмүккэ бизнесменнэр куораты сайыннарарга туһуламмыт этиилэри хомуйарга сүбэлэстилэр диэн сэһэргээтилэр.