От ыйын 13 күнүгэр Дьокуускай куорат маастар-былаанын оҥорууга анаммыт бүтүн Арассыыйатааҕы куонкурус түмүгэ таҕыста. Финалга үс консорциум тахсыбытыттан Генеральнай былааны оҥорор Москватааҕы институт салалталаах бырайыак кыайыылааҕынан таҕыста.
Ил Дархан Айсен Николаев куонкуруска кыттыбыт бары кыттааччыларга махтанан туран, киирбит бырайыактар бары олус интэриэһинэйдэрин эттэ.
– Финалга тахсыбыт үс бырайыагы ойуччу тутан бэлиэтиэм этэ. Үс хамаанда үһүөн Арассыыйа улахан куораттарын, ону сэргэ тас дойдуттан бастыҥ архитектордары бэйэлэрин тула мунньубуттар. Манна үөрэрим баар, Саха сирин хампаанньалара куонкуруска көхтөөхтүк кытыннылар. Ити кэлин бэйэлэригэр олус туһалаах буолуоҕа, – диэн иһитиннэрэр кини.
Санатан эттэххэ, бу куонкурус былырыын биллэриллибитэ. Быйыл олунньуга куонкурус саҕаламмыта. Балаҕан ыйыгыра буолуохтаах Илиҥҥи экономическай форумҥа, былаан быһыытынан, бырайыагы РФ бэрэсидьиэнигэр Владимир Путиҥҥа билиһиннэриэхтээхтэр. Маастар-былаан генеральнай былаантан уратыта диэн манна кылгас кэмҥэ уонна уһун болдьоххо ыйыллыбыт соруктар бары биир тиһиктээхтэр уонна структураларынан сылынан, ыйдарынан үллэһиллэн тураллар. Онон былааҥҥа ыйыллыбыт сыал-сорук түргэнник олоххо киирэригэр көдьүүстээх буолуохтаах.
Куонкурус дьүүллүүр сүбэтин быһаарыытынан финалга үс хамаанда киирбитэ. Үһүс миэстэни “Мастер’с План” (Москва) хампаанньа салалталаах хамаанда ылла. Манна Москваттан, Воронежтан, Арменияттан архитектордар, исписэлиистэр кытыннылар. Саха сириттэн М.К.Аммосов аатынан ХИФУ прикладной экологияҕа научнай-чинчийэ института, Историческай факультета уонна “База14” архитектура бюрота кыттыбыттара. Иккис миэстэҕэ “АйЭнДи Аркитектс” (Москва) хамаандата таҕыста. Манна Москва куорат икки бырайыактыыр хампаанньалара кытыннылар.
Куонкурус кыайыылааҕынан Москва генеральнай былаанын оҥорор институт салалтатынан үлэлээбит хамаанда ааттанна. Москва, Санкт-Петербург архитектордарын таһынан бырайыакка Саха сирин “ЛСТК-Проект” тэрилтэтэ, М.К.Аммосов аатынан ХИФУ Инженернэй-техническэй института көхтөөхтүк кытыннылар. Кыайыылаах тахсыбыт хамаанда бырайыага Дьокуускай куорат тирээн турар кыһалҕаларын быһаарыыга төһүү буолуохтаах. Куонкуруса барыта 35 хампаанньа кыттыбыт. Арассыыйа уон куоратыттан 34 регистрация киирбит, онтон 11 хамаанда эрэ куонкурус быраабылатынан сайаапка биэрбиттэр.
Аграфена КУЗЬМИНА