Бэҕэһээ, Дьокуускай куорат мэрэ Айсен Николаев уонна «Русские автобусы — Группа ГАЗ» ХЭУо атыыга дириэктэрэ Евгений Носов, Дьокуускай куоракка 467 саҥа оптуобуһу биэрэр сөбүлэҥи түһэристилэр. Бастакы 18 оптуобуһу от ыйын 1 күнүгэр Дьокуускайга аҕалыахтара.
«Арассыыйа хампаанньаларын аныгы оптуобустарын аҕалан, Дьокуускайы куттала суох буолуу ирдэбилигэр эппиэттиир көлөлөрүнэн хааччыйар былааннаахпыт», — диир Айсен Николаев.
Сөбүлэҥ чэрчитинэн, 18 оптуобуһу от ыйын 1 күнүгэр Дьокуускайга аҕалыахтаахтар. Сыл бүтүөр диэри эбии 40 көлө аҕалыллара күүтүллэр. Оттон 2024 сылга диэри, Дьокуускай куорат 327 «Вектор» уонна 140 «КАВЗ» оптуобустарынан хааччыллыа.
«Уһук Илин сайдыытын министиэристибэтэ өйөөбөтөҕө буоллар, бу кыһалҕаны быһаарар ыарахан буолуо этэ. Биһиги бэйэбит кыахпытынан, өрөспүүбүлүкэ өйөбүлүнэн, аҕыс сыл иһигэр быһаарар сорук туруорбуппут. Онтон Уһук Илин сайдыытын министиэристибэтэ өйөөн, кыһалҕа түргэнник быһаарыллар буолла»,- диэн Айсен Николаев бэлиэтиир.
Дьокуускайга диэри аҕалыллар сууматын киллэрэн туран, биир ПАЗ «Вектор» оптуобус быһа холуйан 4 мөл. солк. чугаһыыр сыаналаах, «КАВЗ»— 5-6 мөл.солк. диэн суруллар. Бу оптуобустары дьону таһыынан дьарыгырар урбаанньыттарга атыылыахтара.
Николай ПОПОВ, «Саха сирэ» хаһыат, edersaas.ru