Дьокуускайтан чэпчэтиилээх авиакөтүү боппуруоһунан Росавиацияны уонна РФ тырааныспарка министиэристибэтин кытары көрсүһүү былааннанар

Уһук Илинтэн субсидиялаах көтүүгэ Дьокуускай куорат хабыллыбакка, үгүс киһи соһуйда. Онон бу туһунан кэпсэтии бу күннэргэ социальнай ситимнэргэ уҕараабат.

СӨ тырааныспарын уонна суол хаһаайыстыбатын миниистирэ  Владимир Сивцев этэринэн, урукку курдук чэпчэтиилээх билиэтинэн Арассыыйа киин куораттарыгар көтүүгэ 23 саастарын туола илик эдэр ыччат, биэнсийэлээхтэр (дьахталлар 55-с саастарыттан үөһэ, эр дьон 60 саастарыттан үөһэ), бастакы группалаах инбэлииттэр, оҕо эрдэхтэриттэн инбэлииттэр, элбэх оҕолоох ыаллар туһаналлар.

Оттон Уһук Илин бары олохтоохторо субсидиялаах билиэтинэн туһаныы бырагырааматыгар,  Мииринэй – Москва – Мииринэй, Полярнай – Москва – Полярнай уонна Нерюнгри – Москва – Нерюнгри эрэ хайысхалара хабыллыбыттара.

«Билигин Дьокуускайтан уонна Мииринэйтэн эбии квотаны ылыыга Росавиацияны кытары кэпсэтэ, сүбэлэһэ сылдьабыт.  Өрөспүүбүлүкэ салалтата дойду бырабыыталыстыбатыгар Дьокуускайтан уонна Мииринэйтэн субсидиялаах көтүүгэ үбү-харчыны хос тыырыыга этии киллэрдэ.  Маны таһынан чугастааҕы кэмҥэ Росавиацияны уонна Тырааныспар министиэристибэтин кытары оробуочай көрсүһүү быланнанар», — диэн  Владимир Михайлович кэпсээтэ.

Чэпчэтиилээх билиэтинэн Уһук Илин олохтоохторо эрэ туһанар кыахтаахтар. Онон промышленнай хампаанньалар «вахтовиктара» бу бырагыраамаҕа хабыллыбаттар.

Олунньу  15 күнүттэн «АЛРОСА» авиахампаанньа чэпчэтиилээх билиэттэри атыыга таһаарда. Мииринэй – Москва – Мииринэй, Полярнай – Москва – Полярнай маршрутунан биир хайысха сыаната  8 700  солкуобай.