Дьокуускайга го оонньууга анаммыт квест буолла

Ааптар: 
Бөлөххө киир:

Го онньууга анаммыт Genius Extreme бэстибээл уонна Ил Дархан Го оонньууга Куубагын иннинэ Дьокуускай куорат уонна Арассыыйа Го оонньууга федерацията квест оонньуулары ыыттылар. Бу таайбараҥ оонньууларга уопсайа 200 кэриҥэ киһи кыттыыны ылла. Ким баҕарар кыттан 5 тыһыынча солкуобайы эбэтэр го оонньуу наборун сүүйүөн сөп этэ.

Сорудахтары «Якутск GO» саайтка таһааран испиттэрэ. Маҥнайгы сорудахтар дьон бары көрөрүн курдук ыйаммыттара, онтон салгыы сорудахтары таайбыт эрэ дьон кистэлэҥ QR-кодтары булан квесты салгыыр кыахтаммыттара.

Маҥнайгынан квесты Иван диэн аатаах кыттааччы ааспыта. Кини бүтэһик ыйыллыбыт сири булан Бекетов пааматынньыгар бастакынан тиийбитэ. Иккис нэдиэлэ кыайыылааҕынан Екатерина диэн кыыс буолбута, ону туоһулаан Былатыан Ойуунускай пааматынньыгын аттыгар түспүт “селфи” хаартыскатын ыыппыта. Үһүс таайбараҥ кыайыылааҕынан Ньургуйаана буолбута. Ньургуйаана үс оонньууга барытыгар кыттыыны ылан баран, үһүс сырыытыгар бастакы кэлэн үөрүүтэ үксээбитэ.

“Маҥнайгы квесты кыайан таайбатаҕым. Иккиһи таайбытым эрээри, мин иннибинэ атын киһи эрдэ тиийэн кыайыылаах буолбута. Үһүскэ маҥнайгы түһүмэҕин чэпчэкитик таайан бириэмэбин харыстаабытым, онон хата кыайыылаах буоллум!” — диэн Ньургуйаана хайдах оонньообутун туһунан кэпсиир.

Genius Extreme бэстибээл саҕаланыа аҕыйах хонук иннинэ, бүгүн «Якутск GO» телеграм-ханаалыгар бастыҥ оонньооччуну талар куоластааһын саҕаланна.

«Го оонньууга анаммыт тэрээһиҥҥэ кыттыыны ыламмыт олуһун астынныбыт. Бары кыттааччыларбыт олус өйдөөх дьон буолалларын көрдөрдүлэр – уустук таайбараҥнары кылгас кэм иһигэр ыллылар. Сорохторго бастакы буолуохтарыгар аҕыйах мүнүүтэ тиийбэккэ, бэрт кыһыылаахтык кыайыыны мүлчү туттулар. Билигин кыайыылаахтар “селфилэринэн” куоластааһыны ыытыахпыт. Талыллыбыт оонньооччуну Genius Extreme бэстибээл кэмигэр биллэриэхпит” — диир «Якутск GO» саайт эрэдээктэррэ Саргылана Захарова.

Го оонньууга дойду чулуулара атырдьах ыйын 22 күнүгэр Дьокуускайга мустан Ил Дархан Куубагын туһугар киирсиэхтэрэ. Биэс хонуктаах оонньуулар кэмнэригэр саҥа чөмпүйүөннэр ааттара биллиэхтэрэ. Ону тэҥэ Дьокуускайга куораттааҕы го оонньууга анаммыт Genius Extreme бэстибээл ааһыаҕа.

+1
0
+1
0
+1
0
+1
0
+1
0
+1
0
+1
0