Дьокуускай куорат Залог оройуонун мас тутууларын саҥардыы үлэтэ сотору кэминэн саҕаланыахтаах. Киин куорат 55-с кыбартаалыгар баар Реальнай училище, Эр дьон прогимназиятын дьиэтэ, Шергин шахтата историческай суолталаахтар.
Айсен Николаев киин куорат биир историческай суолталаах оройуонун саҥардыыга туһуламмыт сүбэ мунньаҕы бүгүн ыытта.
Эрэгийиэн уонна муниципипальнай былаастар «дорожнай каартаны» оҥорон бигэргэтиэхтээхтэр. Дьону көһөртөөн, туох баар инфраструктураны оҥоруохтаахтар.
Саха сирин кылаабынай архитектора Ирина Алексеева этэринэн, бүгүҥҥү туругунан туһааннаах кыбаарталга 87 сир учаастага, 79 эбийиэк баар.
Дьокуускай куорат баһылыгын эбээһинэһин толорооччу Евгений Григорьев: «55-с кыбаартал территориялары кэлимник сайыннарыы сокуонугар олоҕуран оҥоһуллуоҕа. Туһааннаах сокуону былырыын куорат дуумата ылыммыта», — диэн эбэн эттэ.
СӨ Ил Дарханын уонна бырабыыталыстыбатын пресс-сулууспата