Бүгүн 14.00 чаастан Дьокуускайга Хомсомуол болуоссатыгар Ырыа күнүгэр аналлаах бырааһынньыктааҕы кэнсиэр буолуоҕа.
edersaas.ru
Ырыа кэлэктииптэрэ, артыыстар уонна айар үлэҕэ саҥа холонон эрэр ыччаттар холбоһуктаах кэнсиэртэрэ 3,5 чаас устата буолуоҕа.
Ол курдук, эһигини Суорун Омоллоон аатынан Опера уонна балет судаарыстыбаннай тыйаатырын, Г.М.Кривошапко аатынан СӨ судаарыстыбаннай филармониятын артыыстара уонна А.Д.Макарова аатынан култуура уонна ускуустуба кэллиэһин устудьуоннара эҕэрдэлиэхтэрэ.
Онтон Покровскай куоракка эмиэ бүгүн ыытыллар «Муус барар күнэ» бырааһынньыктааҕы бырагыраамаҕа Ю.Е.Платонов аатынан Эстрада судаарыстыбаннай тыйаатыра, «Туймаада» судаарыстыбаннай вокальнай ансаамбыл, Марфа уонна Сергей Расторгуевтар ааттарынан Саха судаарыстыбаннай циркэтэ кыттыахтара.
Бу күн өссө саҥа ырыа сүрэхтэниитэ күүтэр. Ол курдук, Наталья Михалева-Сайа тылларыгар, Алексей Калининскай-Луҥха мелодиятыгар «Уран уус саха» диэн ырыаны Любовь Константинова-Кыталы Куо уонна Евдокия Павлова-Кылыһах Далбар толоруохтара. Ырыа күнүгэр анаммыт кэнсиэркэ «Күн дьоно» фольклор бөлөҕө «Манчаары» ырыаларын билиһиннэриэхтэрэ.
Уйаҕас намыын ырыа санааҕытын угуттаатын, олоххут ырыа аргыстаннын!
Надежда ЕГОРОВА, «Саха сирэ», edersaas.ru