![](https://edersaas.ru/wp-content/uploads/2018/06/Risunok5.jpg)
Бүгүн ыччат дьыалаларыгар уонна дьиэ кэргэн бэлиитикэтин министиэристибэтин уопсастыбаннай сүбэтин бастакы мунньаҕа буолла. Аһаҕас мунньахха Гражданскай форум тэрээһинин, итиэннэ Инники көлүөнэ пааркатын тутуутун туһунан кэпсэттилэр. Ону таһынан, СӨ Ыччат уонна ыал бэлиитикэтин министерстибэтин бырайыагын – Ыччат ресурснай киинин тутуутун кылгастык ырытыстылар.
Гражданскай форум туһунан Уопастыбаннай көҕүлээһини сайыннарыы бырабылыанньатын салайааччыта Татьяна Глушкова тыл эттэ. Оттон Инники көлүөнэ пааркатын уонна Ыччат ресурснай киинин туһунан миниистири бастакы солбуйааччы Василина Лукина кэпсээтэ уонна үөскээбит ыйытыктарга хоруйдаата.
Мустубут дьон, бары да кэриэтэ, Инники көлүөнэ пааркатын дьыалатыгар бэйэлэрин көрүүлэрин, баҕаларын, тэҥҥэ үлэлэһэргэ бэлэмнэрин этэ кэлбиттэр. Былааннанар паарка Сэргэлээххэ түөрт уулусса (Каландаришвили, Петровскай, Белинскэй уонна Ойуунускай) быһа охсуһууларын ортото хас да сыл кураанах турбут сиргэ оҥоһуллуохтаах.
Анастасия Никитина, Ветеринария департаменын үлэһитэ:
— Бу сиргэ урут сибирская язваны чинчийэр лаборатория турбута. Ыарыыны утарар эмп оҥорор сыалтан сүөһүнү соруйан ыарытыннаран, кэтээн көрөн, онтон онно уматан, чугастыы көмөр эбиттэр. Билигин ол сиргэ туох эмит тутуллуон иннинэ буор аналиһа ыытыллыахтаах, ол үчүгэй көрдөрүүлээх буоллаҕына, тутуу үлэтэ барыан сөп.
Этиллибит буор бэрэбиэркэтин ыччат министиэристибэтэ РФ Роспотребнадзорун ыытарга көрдөспүт. Кинилэртэн көҥүл биэрэр эппиэт кэллэҕинэ, атырдьах ыйын чугаһыгар паарканы тутуу макетын куонкуруһа биллэриллиэхтээх. Ол иннинэ дьон пааркаттан тугу кэтэһэллэрин, туох аналлаах, хайдах буолуон баҕаралларын истиитэ буолла.
Паарка киһи дуоһуйа сынньанарыгар табыгас, араас саастаах дьоҥҥо барсар, чугас массыына турар сирдээх буолуохтааҕын бары сөпсөспүттэрэ. Арай былааннанар паарка аһаҕас халлаан анныгар туруохтааҕын сорох дьон утарбыта. Ону кытта чөл олоҕу сайыннарар туһугар спордунан дьарыктанар дьон хайыһар, аэротурба, скейтборд, сноуборд площадкаларын оҥоруоҕуҥ диэн этии киллэрбиттэрэ. СӨ архыыбыгар үлэлиир Ирина Георгиевна үүнэр көлүөнэҕэ анаан Саха сирин историятын тааска үйэтитэр бырайыагы сүбэлээтэ.
Биллэн турар, этиллибит санаалар бары бииргэ туолаллара уустук. Бу мунньахха миниистиэрстибэ уопсастыбаннастан истибит араас санааларын-оноолорун тупсаран-сайыннаран дьон-сэргэ дьүүлүгэр таһааран, социальнай ситимнэр нөҥүө ыйытык оҥоруохтаах.
Светлана ИВАНОВА, «Саха Сирэ» хаһыат, edersaas.ru