Дьокуускайга уопсастыбаннай тырааныспар ситимин саҥардыыга, тупсарыыга үлэ ыытыллыа.
Тырааныспар ситимин саҥа киэбэ оҥоһуллуутугар маршруту тупсарыы, тырааныспары саҥардыы, дьоҥҥо табыгастаах буолларын курдук цифровой өҥөнү киллэрии, о.д.а. былааннанар. СӨ Ил Дархана Айсен Николаев министиэристибэлэр, куорат дьаһалтата уонна тустаах тэрилтэлэр салайааччыларын кытта ыытыллыбыт сүбэ мунньахха маннык соруктары туруорда.
«Дьокуускай Уһук Илиҥҥэ уонна дойдуга саамай түргэнник үүнэр-кэҥиир, улаатар куораттартан биирдэстэрэ. Манна уулуссалар ситимнэрэ кэҥэтиллэр, суол-иис оҥоһуллар, өрөмүөннэнэр, нэһилиэнньэ улаатар. Маныаха дьон ирдэбилэ эмиэ үрдээн иһэр. Итиннэ биһиги өрөспүүбүлүкэбит киин куората олохтоохтор баҕаларыгар, ирдэбиллэригэр эппиэттиир буолуохтаах«, — диэн этэр Ил Дархан.
Саха АССР 100 сылыгар 100 саҥа оптуобус ылыллар. Ол эрээри, автопаарканы быстахтаан саҥардыы кыһалҕаны быһаарбатынан, систиэмэни кэлимник уларыттахха эрэ бу ситиһиллиэҕэр Ил Дархан эрэнэр. Маны сэргэ, кини тырааныспар ситимин саҥа киэбин оҥорорго, куорат маастар-былаанын учуоттуулларыгар эттэ.
Ил Дархан «Куттала суох хаачыстыбалаах суоллар» национальнай бырайыагынан сибээһи, светофору, уоттаах таблолары, суолга-иискэ кэлиини-барыыны устар видеокамералары кэҥэтэри бэлиэтээтэ. Оттон бырайыаһы каартанан уонна төлөпүөнүнэн төлүүр систиэмэ Дьокуускайга бастакынан киллэриллибитин уонна бу хайысханы сайыннарыыга үлэ салҕанарын ыйда.
Түмүккэ Ил Дархан бастакы вице-премьер Дмитрий Садовниковка суол каартатын оҥорорго уонна ый иһинэн үлэ былаанын киллэрэригэр соруйда. Оттон бырайыак олоххо киириитин хонтуруолга ыларын эттэ.
Хаартыскаларга Андрей Сорокин (СИА) түһэриилэрэ
+1
+1
+1
+1
+1
+1
+1