Бүгүн, балаҕан ыйын 8 күнүгэр, илин эҥэр уонна киин улуустарга, Дьокуускайга улахан тыал түстэ. Тыал сөкүүндэҕэ 20 миэтирэҕэ тиийэ түргэннээхтик үрэн оптуобус тохтобуллара сууллубуттара, реклама баннердара алдьаммыттара, профлиистэр көппүттэрэ.
Маннык күүстээх тыал содулуттан түөрт киһи эмсэҕэлээн мэдиссиинэ көмөтүгэр наадыйбыт. Итилэртэн биирдэстэрэ нейрохирургия салаатыгар эмтэнэ киирбит. Бу туһунан 2№-дээх өрөспүүбүлүкэтээҕи балыыһа суһал мэдиссиинэ көмөтүн киинин пресс-сулууспата иһитиннэрэр. Ол курдук социальнай ситимҥэ тарҕаммытынан, 203 микрооройуоҥҥа бородуукта маҕаһыыныгар тыалтан аан өстүөкүлэтэ сууллан ити киһи эмсэҕэлээбит.
Бэлиэтээн эттэххэ, бу тыалы-кууһу «Хинамнор” диэн тайфун аҕалбыт. Нэдиэлэ бүтүүтэ халлаан туруга көнүөҕэ диэн синоптиктар билгэлииллэр.
Күүстээх тыалтан алдьаммыты куорат тустаах сулууспалара оҥоро сылдьаллар.
Күүстээх тыал Хаҥалас улууһун Өктөм бөһүөлэгэр элбэх оҕолоохторго түҥэтиллибит уһаайбаларын таһыгар түөрт-биэс остуолбаны суулларбыт. Бу туһунан Өктөм олохтооҕо Юлиана Николаева сырдатта:
— Сарсыарда үлэбэр баран иһэн уот ситимин остуолбалара суулла сыталларын көрөн улаханнык соһуйдум. Ол да иһин түүн тыал тыаһа куһууран ынырык этэ. Сууллубут остуолбалар боруобаттарын таарыйымаары нэһиилэ массыынабынан ааспытым. Дьоҥҥо-сэргэҕэ, сылгыга-сүөһүгэ сэрэхтээх эбит диэн санаан аһарбытым.
Ульяна ЗАХАРОВА.
Өктөмҥө сууллубут остуолбалар хаартыскалара ааптар көҥүлүнэн туһанылыннылар.