Бэҕэһээ, кулун тутар 30 күнүгэр, Судаарыстыбаннай Эрмитаж сүрүн ыстаабыгар үөрүүлээх быһыыга-майгыга Санкт-Петербургтан Дьокуускайга тотальнай дьыктаан символын тиэртилэр. Арассыыйаҕа Дьокуускай бу аахсыйаны туппут төрдүс куоратынан буолар. Ааспыт сыл аахсыйаҕа 606 куоракка, 45 дойдуга, 1646 былаһаакка тэриллибитэ.
«Эрмитаж сүрүн ыстаабыгар биир дойдулаахпыт Андрей Геласимов 2020 сыллаахха тотальнай дьыктааны аахпыта. Саха сирин аатыттан тотальнай дьыктаан эстафетатын ХИФУ үөрэҕи таһынан проректоры солбуйааччы Саргылана Нестерова тутта. Бу күн Санкт-Петербург-Дьокуускай хайысханан көтөр сөмөлүөт пассажирдар демодиктант суруйдулар,» — диэн култуура миниистирин солбуйааччы Владислав Левочкин эттэ.
Бүгүн, кулун тутар 31 күнүгэр, Дьокуускайга Кулаковскай аатынан Норуоттар доҕордоһууларын дьиэтигэр күнүс 14.00 чаастан таба суруйуу бэстибээлин чэрчитинэн «Тотальнай дьыктаан» бырайыак ааптара Ольга Ребковец, суруйааччы Андрей Геласимов уонна эспиэр Антон Сомин кыттыылаах тэрээһин ыытыллыаҕа.
Ульяна Захарова, edersaas.ru
Хаартыска ulus.media саайтан.