Дьокуускайга Табахтааһыны утары охсуһуу күнүн бэлиэтээтилэр

Бөлөххө киир:

Комсомольскай болуоссакка Табахтааһыны утары охсуһуу аан дойдутааҕы күнүгэр Доруобуйа дьаарбаҥката, “Доруобай ыччат – доруобай өрөспүүбүлүкэ!” аахсыйа, флешмобтар, табахтарын быраҕыахтарын баҕарар дьоҥҥо аналлаах трениннэр, уо.д.а. буоллулар.  Баҕалаах дьон аатырбыт сүүрүүк Сардаана Трофимованы кытары сэрээккэлээтилэр, медосмотру бардылар, куонкурустарга кытыннылар, кэнсиэри көрдүлэр.

Ыам ыйын 31 күнүгэр Табахтааһыны утары охсуһуу аан дойдутааҕы күнэ 1987 сылтан бэлиэтэнэр. Табах буортутун туһунан бары билэбит эрээри, табахтыыр дьон ахсаана аҕыйаабат. 30-рын ааспыт дьоҥҥо эрдэ өлүү 10%-на табахтан төрүөттээх. Доруобуйа харыстабылын аан дойдутааҕы тэрилтэтин (ВОЗ) дааннайдарынан, сыллата 8 мөлүйүөнтэн тахса киһи табахтан сылтаан өлөр. Онон бу маннык тэрээһиннэри ыытан, табахтааһын кыһалҕатыгар уопсастыба болҕомтотун тарда сатыыллар уонна табахтарын быраҕыахтарын баҕарар дьоҥҥо көмөлөһөллөр.

Кэнники кэмҥэ оҕолор, ыччат электроннай сигареталарынан, кальянынан үлүһүйэр буоллулар. Кинилэр ону буортута суох дии саныыллар. Дьиҥинэн, электроннай сигарета табахтааҕар өссө ордук буортулаах, тоҕо диэтэр, син биир никотиннаахтар, ону ааһан, паар курдук киирэр буолан, тыҥаҕа буортулаахтар, искэн үөскүөн сөп.

Онон улаатан эрэр оҕолорго, ыччакка табах, электроннай сигарета буорутутун туһунан төрөппүттэр, учууталлар быһааран, өйдөтөн биэриэхтээхтэр.

Ангелина Васильева, “Саха сирэ” хаһыат, edersaas.ru

Хаартыска: СИА.

.

+1
0
+1
0
+1
0
+1
0
+1
0
+1
0
+1
0