Ойуур баһаарыттан сэрэтэр сыаллаах Саха сиринээҕи суһал быһыы-майгы управлениетын үлэһиттэрэ ыам ыйын уһун өрөбүллэригэр кытаанах эрэсиимҥэ үлэлээтилэр. Ол курдук ойуур баһаарын таһаарбат туһуттан айылҕаҕа сылдьан бэрэбиэркэлиир рейдэлэри оҥордулар.
«Ыам ыйын устатыгар уопсайа 400 кэриҥэ Дьокуускай олохтооҕо инструкцияны ааста. Айылҕаҕа сылдьыы бобуллубат, арай уот оттор кытаанахтык бобуллар. Шашлык астанарга анал сирдэр бааллар, онно даҕаны баһаартан сэрэтэр гына сири хаһан мангалы төгүрүччү эргийэр наада. Сэрэххэ, уот барар түгэнигэр умулларарга уулаах буолуохтаахтар», — диэн Дьокуускай куорат УНДиПР суһал быһыы-майгыны хонтуруоллуур управление инженерэ Леонид Игнатьев этэр.
Айылҕаҕа сылдьан уот оттон шашлыктыырга Дьокуускай туонатыгар түөрт эрэ көҥүллэммит сир баар:
— Кангаласс мкр — чох сүөкэнэр сирин таһынан, Өлүөнэ биэрэгэр;
— Покровскайдыыр суол 25 км. Табаҕа сэлиэнньэтин таһыгар, «Синньигэс» күөл хаҥас биэрэгэр;
— Намныыр суол 22 км суол хаҥас өттүгэр;
— Покровскайдыыр суол 20 км суол уҥа өттө.
Ульяна Захарова.