Дьокуускайга сыбаалка умайар

Бөлөххө киир:

Ыам ыйын 24 күнүгэр Дьокуускайга Бүлүүлүүр аартыкка баар бөх тоҕор сир умайда. Билиҥҥитэ 500 кв.м. иэннээх сир умайар.

Баһаары умуруорууга “Жикомсервис” бульдозердара, федеральнай этэрээттэн 2 баһаарынай массыына, 2 уу кутар массыына үлэлииллэр. Эбии 3 уу кутар массыына кэллэ, Сайсаар уокуругун патрульнай-маневреннай сулууспата үлэлиир.

Бүгүҥҥү туругунан баһаары умуллара иликтэр. Хотугулуу-арҕааттан күүстээх тыал үрэн, баһаары күөдьүтэр уонна куорат киин, соҕурууҥҥу өттүн буруонан бүрүйэр. Пааркаттан саҕалаан, Сайсаарга диэри, онтон да салгыы Птицефабрикаҕа диэри сыбаалка буруота тунуйда. Куорат хотугу өттүгэр салгын ыраас. Ол эрээри, тыал хайысхата уларыйыан сөп.

Сыбаалка буруота ойуур баһаарын буруотунааҕар быдан буортулаах, тыынар уоргаҥҥа куһаҕан дьайыылаах, эти-хааны сүһүрдүөн да сөп. Тоҕо диэтэр, барыта былаастык, химическэй бэссэстибэ, араас бөх-сах умайар. Онон, буруо сытын ыллаххытына, түннүгү аһымаҥ, таһырдьа күүлэйдииртэн туттунуҥ.

Санатар буоллахха, сыбаалка былырыын баччаларга эмиэ умайбыта. Баһаарынайдар хас да күнү быһа сыралаһан,  умулларбыттара. Бу кэнниттэн сыбаалкаҕа cайын устата баһаар күөдьүйбэтэҕэ.

Ангелина Васильева, “Саха сирэ” хаһыат, edersaas.ru

Хаартыска: bezformata.ru.

+1
0
+1
0
+1
0
+1
0
+1
0
+1
0
+1
0