Дьокуускайга суол быһылааныгар 18 саастаах эдэр киһи суорума суолланна

Барыллаан быһаарыынан, балаҕан ыйын 22  күнэ үүнэр  түүнүгэр, 2 чаас саҕана,  18 саастаах суоппар «Субару Форестерынан»   Нам суолунан Тулагыттан кэлэн иһэн,   уот остуолбатыгар сааллыбыт.

Ити түмүгэр тимир көлө кэлин олбоҕор олорбут 18 саастаах эдэр киһи  ылбыт эчэйиилэриттэн  тыына быстыбыт, суоппар уонна өссө икки пассажир эт-хаан араас эчэйиилэрин ылбыттар. Биирдэрэ ыарахан туруктаах сытар.

Полиция үлэһиттэрэ анал тэхиньиичэскэй  тэрил көмөтүнэн  суоппар  арыгыны испитин-испэтэҕин бэрэбиэркэлээбиттэригэр, 0,40 мг/л диэни көрдөрбүт. Суоппар тимир көлөнү ыытар быраабы быйыл муус устарга ылбыт. Кини быһаарбытынан, айаннаан иһэн хайа эрэ кэмҥэ утуйан ылбыт, ол түмүгэр  ити саахал тахсыбыт. Кини айанныан иннинэ биир бытыылка пиибэни испит. Билигин суоппар  силиэстийэлиир отделга  хаайыллан сытар.