Саха АССР тэриллибитэ 100 сылын көрсө, Дьокуускай куоракка Е.Ярославскай аатынан түмэлигэр «Сунтаар үйэлэр мөҥүөннэригэр» диэн ааттаах Сунтаар олоҕун кэпсиир быыстапка бүгүн, от ыйын 27 күнүгэр, аһылынна.
Манна улуус салаата барыта хабыллыбыт. История, культура, үөрэх салаата, тыа хаһаайыстыбата, бырамыысыланнас, спорт олоҕун көрдөрөр икки сүүстэн тахса экспонат аҕалыллан турда. Быыстапканы аһыыга СӨ культуратын, духуобунаһын сайдыытын миниистирэ Ю.Куприянов, Сунтаар улууһун баһылыга А.Григорьев, культура улуустааҕы управлениетын салайааччыта М.Кобельянова о.д.а. тыл эттилэр. Сунтаар олоҥхо, оһуокай улууһунан сураҕырарын быһыытынан алгысчыт, Дархан этээччи Кураһаай Мэхээлэ алгыһынан, оһуокайынан төрүттэнэн сунтаардар быыстапкалара үрдүк таһымнаахтык аһылынна.
19 үйэ саҕаланыытыгар оҥоһуллубут, 40 лиитэрэ кымыс киирэр ымыйа баара сөхтөрөр. Маны сэргэ билиҥҥи көлүөнэ биллэр маастара, СӨ искусствотын диэйэтэлэ Дабайар Уус Николай Потапов оҥорбут үрүҥ көмүс ыҥыыра онтон да атын сүҥкэн оҥоһуктар бааллар. Сунтаарга 40-тан тахса музей баар ,олортон талыллан кэлбит оҥоһуктар ыйы быһа дьон көрүүтүгэр таҕыста.
Марта Николаева, edersaas.ru саайтка анаан