Кулун тутар 26 күнүгэр Туймаада туонатыгар, Арчы дьиэтигэр “Сунтаар оһуокайа” тэрээһин ыытылла турар. Биир дойдулаахтар, оһуокайы таптааччылар, уопсайа олус элбэх киһи кэлэн, алгыс ылан, ахтыспычча-кэтэспиччэ, тириилэрэ тэнийиэр диэри оһуокайдаатылар. Бу күн өрөспүүбүлүкэ Дархан этээччилэрэ бары кэриэтэ кэлэн, үҥкүү тылын таһаардылар, киэҥ түһүлгэлэри төрүттээтилэр.
Марта Николаева, суруналыыс, оһуохайдьыт, алгысчыт:
— Ыһыаҕы санатар, үс куппутун бөҕөргөтөр улууканнаах оһуокайы Сунтаар этээччилэрэ күөх хонууну сибэккинэн тэнитэр кэриэтэ тэниттилэр. Дархан этээччи Кураһаай Мэхээлэ барахсан хонноҕо аһыллан, тэнийэн, иэйэн туран, балтараа чааһы быһа түһүлгэлээтэ. Хас да хос тэнийэн үҥкүүлээтибит. Аар Дархан этээччи Афанасий Алексеев түһүлгэттэн тахсыбакка кынаттаан, барыбытын сөхтөрдө. Дьиҥнээх этээччи, чулуу спортсмен кыаҕа улахан буоллаҕа дэстибит.
Салгыы Ырыа Дьаархан диэн аатынан биллэр, Дархан этээччи Лариса Иванова, Тойбохойтон Лилия Михайлова түһүлгэлэрин кынаттаһан, дьоллоох сахалар буоллубут. Оһуокай өссө да буола турар. Мэҥэ Хаҥаластан Людмила Неустроева, Намтан Валентин Хорунов киирэн, биир дойдулаахтарын көрсөн үөрүү үтүмэнэ. Махтал, улуу Сибиэрэп утумун тута сылдьар этээччилэрбитигэр, — диэн кэпсээтэ.
Ангелина Васильева, “Саха сирэ” хаһыат, edersaas.ru