Саха сиригэр нэһилиэнньэ хаачыстыбалаах уонна табыгастаах мэдиссиинискэй өҥөнөн туһанарыгар өрөспүүбүлүкэ салалтата туох кыалларын оҥорор. Бүгүн, муус устар 29 күнүгэр, Дьокуускай куоракка Стоматология анал киинэ үөрүүлээх быһыыга-майгыга аһылынна.
edersaas.ru
Дьокуускай куорат Свердлов уулуссатын 3/2 аадырыһыгар баар 5 мэндиэмэннээх сабыс саҥа дьиэни 2019 сыллаахха СӨ Баайга-дуолга уонна сиргэ сыһыаннаһыыга министиэристибэтэ Стоматология аныгы киинигэр биэрэр туһунан дьаһала тахсыбыта. Салҕыы өрөспүүбүлүкэ бырабыыталыстыбатын өйөбүлүнэн бу дьиэ ис бараана саҥардыллыбыта уонна толору өрөмүөннэнэн, САССР 100 сылын көрсө үлэҕэ киллэрилиннэ. Тиис ыарыытын быһаарар уонна эмтиир аныгы тэриллэринэн сэбилэммит киин улахан дьон уонна оҕолорго тиистэрин хаачыстыбалаахтык эмтиэҕэ.
Кыһыл лиэнтэни РФ доруобуйа харыстабылын миниистирин солбуйааччы Евгений Камкин, Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Ольга Балабкина, СӨ доруобуйа харыстыбалын миниистирэ Лена Афанасьева быстылар. Ону таһынан тэрээһиҥҥэ өрөспүүбүлүкэ эмтиир тэрилтэлэрин салайааччылара, мэдиссиинискэй үлэһиттэр уонна Стоматология анал киинин бэтэрээннэрэ кытыннылар.
Бүгүн киин үөрүүлээх аһыллыытыгар кыттыыны ылбыт РФ доруобуйа харыстабылын миниистирин солбуйааччы Евгений Геннадьевич:
— Саха сиригэр маннык аныгы киин аһыллан, Дьокуускайга уонна бүтүн өрөспүүбүлүкэҕэ доруобуйа харыстабылын биир салаатын үлэтэ өссө тупсарыгар эрэнэбит. Ол иһин, доруобуйа харыстабылын саҥа эбийиэктэрин арыйар мэлдьи кэрэхсэбилллээх. Киин үлэтэ, бастатан туран, мэдиссиинискэй өҥө оҥоһуллара барыларыгар табыгастаах буоларыгар хайысхаланыаҕа. Ол иһин, аныгылыы өрөмүөннэммит комплекска үлэлииргэ быраастарга уонна эмтэнээччилэргэ бары өттүнэн табыгастаах буолуоҕар эрэнэбин, — диэн эҕэрдэтин тириэртэ.
Киин кылаабынай Марина Юрьевна Пупелене:
— Күндү биир идэлээхтэрим, ытыктабыллаах ыалдьыттар! Бүгүн биһиэхэ умнуллубат кэрэ-бэлиэ күн — стоматология саҥа дьиэтин арыйабыт. Бу түгэн биһиги эрэ кэлэктииппитигэр буолбакка, өрөспүүбүлүкэ нэһилиэнньэтигэр улахан суолталаах. Тоҕо диэтэххэ, поликлиникабыт устуоруйатыгар саҥа кэрдиис кэм арыллар. Өссө 63 сыл анараа өттүгэр куорат 1 №-дээх поликлиникатын базатыгар стоматология бастакы поликлиниката аһыллыбыта. Онтон араас сиргэ дьиэлэнэн баран, кэнники 40 сылга Федор Попов аатынан уулуссаҕа үлэлээн кэллибит.
Кииммитин өрөмүөннээн үлэҕэ киллэрэргэ «2020-24 сылларга доруобуйа харыстабылын сайдыыта» судаарыстыбаннай бырагырааманан өрөмүөн үлэтигэр биһиги 67 мөлүйүөнү баһылаатыбыт, ону таһынан 37 мөлүйүөн мэдиссиинискэй тэриллэри атыылаһарбытыгар бэриллибитэ. Онон, стоматология 29 аныгы тэрилин атыыластыбыт. Ол иһигэр, күнүскү стационарга туһанарга норкуос тэрилэ, томографтаах рентгенодиагностическай ортопантомограф, сыыппаралаах радиовизиографа дентальный рентгеновскай икки аппараат, аныгы стерилизаиялыыр тэрил уо.д.а. Дьиэ иһэ кыратык кэҥэтиллэн, 51 кэбиниэт баар буолла. Онон, биһиги кииммит хаачыстыбалаахтык уонна нэһилиэнньэҕэ табыгастаахтык үлэлиэҕэр эрэнэбит», -– диэн СӨ бырабыыталыстыбатыгар, РФ уонна СӨ Доруобуйа харыстабылын министиэристибэлэригэр, тутааччыларга махталын биллэрдэ.
Кииҥҥэ каадырдарынан хааччыллыы — 98% тэҥнэһэр.
Киин бастакы этээһигэр улахан дьоҥҥо аналлаах регистратура, улахан дьоҥҥо уонна оҕолорго стоматология бастакы сүһүөх көмөтүн подразделениелара, тиис ыарыыта сытыытык киирбит дьонугар көмөнү оҥорор кэбиниэттэр, рентгенология отделениелара бааллар.
Иккис этээс барыта оҕолорго анаммыт.
Үһүс этээскэ улахан дьону эмтиир-ыарыыны сэрэтэр отделениелар, төрдүскэ ортопедия уонна төлөбүрдээх өҕөлөр отделениелара олохсуйбуттар. Бэһис этээскэ тиэхиньиичэскэй сулууспа үлэлиир.
Надежда ЕГОРОВА, «Саха сирэ», edersaas.ru
Мария ВАСИЛЬАВА (СИА) түһэриилэрэ