Бэҕэһээ, сэтинньи 7 күнүгэр, чулуу снайпер Иван Николаевич Кульбертинов төрөөбүтэ 103 сылын туолла.
Бу бэлиэ күн Дьокуускайга, Кыайыы пааркатыгар, снайпер Кульбертинов пааматынньыгын үөрүүлээхтик арыйдылар. Бу саҥа пааркаҕа бастакы пааматынньык диэн иһитиннэрэр Өксөкүлээх Өлөксөй аатынан норуоттар доҕордоһууларын дьиэтин пресс-сулууспата.
И.Н.Кульбертинов 1917 сыллаахха сэтинньи 7 күнүгэр Өлүөхүмэ оройуонун Тээнэ сэлиэнньэтиттэгэр төрөөбүтэ. Аҕа дойду уоттаах сэриитин кыттыылааҕа, хайыһар 23-с туспа суолун биригээдэтин 7-с гвардейскай воздушно-десантскай стрелковай полк иккис гвардейскай воздушно-десантскай Проскуровскай дивизиятын снайпера. Уоттаах сэрии кыраҕы харахтаах бэргэн снайпердарыттан биирдэстэрэ.
Дьон-сэргэ долгуйа күүппүт тэрээһинэ эбэҥки норуотун сиэрин-туомун толорууттан, сүгүрүйүүттэн, аал уоту айах тутууттан, истиҥ махталтан саҕаланна. Сиэри-туому эбэҥки норуотун ассоциацията өрө көтөҕүллэн толордо.
Чулуу снайпер Иван Николаевич Кульбертинов пааматынньыгын СӨ Ил Түмэн Судаарыстыбаннай мунньаҕын бэрэссэдээтэлэ Петр Гоголев, СӨ Ил Дархан уонна Бырабыыталыстыба дьаһалтатын салайар Афанасий Владимиров, Дьокуускай куорат баһылыгын 1 солбуйааччы Евгений Григорьев, Дьокуускай куоракка Өлүөхүмэ оройуонун дьаһалтатын бэрэстэбиитэлэ Алексей Куприянов, Саха сиригэр эбэҥки норуотун ассоциациятыттан Александр Варламов уонна чулуу снайпер сиэнэ Северина Кульбертинова арыйдылар. Долгутуулаах бэлиэ түгэн, ытык киһини чиэстээн, салгыҥҥа тэҥҥэ салют ытыытынан уонна дохсун ытыс тыаһынан доҕуһуолланна.
Умнуллубат түгэни «Гиркилэн» ансамбль үҥкүүнэн, Дэвэйдэ ырыанан ситэрэн-тупсаран биэрдилэр.
Улуу Кыайыыны уһансыбыт чулуу снайперга, ытык киһиэхэ хоолдьуктаах бэйэбит хоҥкуйабыт, сүһүөхтээх бэйэбит сүгүрүйэбит, тоноҕостоох бэйэбит тоҥхойобут !
Хаартыскалар тэрээһин кыттыылаахтарын уонна Ил Түмэн пресс-сулууспатын түһэриилэрэ