Бу сыл от ыйын 12-18 күннэригэр Дьокуускайга Норуоттар икки ардыгар ыытыллар Сэлии кыһалҕаларыгар анаммыт пуорум буолара күүтүллэр. Пуорум илэ көрсүһүү уонна быһа холбонуу форматтарыгар ыытыллыаҕа. Пуорумҥа АХШ, Великобритания, Франция, Испания, Япония учуонайдара, палеонтология уонна сэлии фаунатын эйгэтигэр бөдөҥ исписэлиистэр кыттыыны ылыахтара.
Көрсүһүү сүрүн түмүгүнэн “Аан дойдутааҕы Сэлии киинэ” научнай-үөрэҕирдэр Консорциум тэриллиэхтээх.
“Аан дойдутааҕы Сэлии киинэ мамонт фаунатын чинчийиинэн дьарыктанар бары тэрилтэлэр кыахтарын түмүөҕэ. Бу консорциум Саха сирин научнай оскуолаларын Арассыыйа бастыҥ уонна тас дойдулар научнай-чинчийэр кииннэрин кытта ыкса, бииргэ үлэлэһэллэрин күүһүрдүөҕэ”, — диэн өрөспүүбүлүкэ Ил Дархана Айсен Николаев этэн турар.
Эспиэрдэр сабаҕалыылларынан, Саха сирин ирбэт тоҥугар аан дойдуга баар сэлии муоһун, уҥуоҕун 70 % кэриҥэ көмүллэ сытар. Оттон аан дойду бары палеонтологическай булумньутун 90 %- на биһиэхэ көстөр. Бу Саха өрөспүүбүлүкэтин сиригэр-уотугар палеонтологическай чинчийиилэр улахан кэскиллээхтэрин туоһулуур.
«Саха сирэ» хаһыат, edersaas.ru
Хаартыска sakha.gov.ru