Дьокуускайга дьахталлар сийиэстэрэ уонна пуорумнара буолуоҕа

Ааптар: 
Бөлөххө киир:

Кулун тутар 2-4 күннэригэр Саха АССР 100 уонна Саха Өрөспүүбүлүкэтигэр Ийэ сылларынан Саха сирин дьахталларын XV сийиэһэ «Женщины Якутии за устойчивое развитие Дальнего Востока и Арктики» уонна Уһук Илин уокуругун дьахталларын II пуорума буолуоҕа.

«Үбүлүөйдээх сийиэскэ уонна пуорумҥа Уһук Илини уонна өрөпүүбүлүкэбитин сайыннарыыга дьоһун суолталаах боппуруостар көрүллүөхтэрэ. Ол курдук олох элбэх хайысхатын хабар, ол иһигэр  национальнай бырайыактары олоххо киллэриини уонна олору кытары ситимнээх дьахталлар социальнай көҥүлээһиннэрин таарыйар  кэпсэтиилэр дьүүллэһиллиэхтэрэ. Ил Дархан Айсен Николаев биллэрбит СӨ Ийэ сылыгар бу курдук далааһыннаах тэрээһиннэр ыытыллаллара бэйэтэ туһунан бэлиэ быһыытынан буолар. Биллэн турар, биһиги манна дьиэ кэргэн институтун бөҕөргөтүү, уопсастыба сайдыытыгар, чэчирииригэр дьахталлар кылааттарын дьоһун суолтатын кэпсэтиэхпит«, — диэтэ СӨ Бырабыыталыстыбатын Бэрэссэдээтэлин солбуйааччы, тэрийэр кэмитиэт бэрэссэдээтэлэ Ольга Балабкина.
Тэрээһин кыттыылаахтара ийэҕэ өйөбүлгэ, дьахталлар дьарыктаах буолууларыгар, доруобуйа харыстабылыгар хаачыстыбалаахтык хааччыйыыга, тулалыыр эйгэни тэрийиигэ, дьахталлар предпринимательствонан дьарыканыыларыгар сөптөөх улусуобуйаны тэрийиигэ боппуруостары ырытыахтара.
Вице-премьер коронавируһунан эпидемиологическай балаһыанньаны учуоттаан, тэрээһиннэр очнай уонна дистанционнай көрүҥүнэн, видеокэмпириэнсийэнэн ыытыллыахтарын эттэ. «Үлэ маннык киэбинэн ыытылларыгар үтүө эрэ өрүттэри көрөбүн. Өрөспүүбүлүкэттэн эрэ буолбакка, атын сирдэртэн элбэх кыттааччыны хабыахпыт«, — диэн кини эбэн биэрдэ.
Түһүлгэҕэ барыта 500 дэлэгээт кыттара былааннанар. «200 кыттааччы очнай киэбинэн кыттыаҕа. Бу өрөспүүбүлүкэ улуустарыттан актыбыыс дьахталлар, дьахталлар сэбиэттэрин салайааччылара, чилиэннэрэ, уопсастыбаннай түмсүүлэр лиидэрдэрэ. 300 дэлэгээт тэйиччиттэн олорон кыттыыны ылыа. Кинилэр ортолоругар Уһук Илин эрэгийиэннэриттэн уонна Арассыыйа атын субъектарыттан баар буолуохтара. Маны таһынан, биһиэхэ тас дойдуттан дьахталлар кыттыахтара«,  — диэн Анжелика Андреева, дьахталлар өрөспүүбүлүкэтээҕи тэрилтэлэрин холбоһугун бэрэсэдээтэлэ сырдатта.
Тэрээһиҥҥэ «Демография», «Үөрэх», «Култуура», «Доруобуйа харыстабыла», «Экология», уо.д.а. национальнай бырайыактары олоххо киллэриигэ дьахталлар кыттыыларын ырытыахтара. «Женское бизнес-сообщество — реальная движущая сила малого среднего предпринимательства» тиэмэҕэ  дьиэ кэргэн биисинэһин тэрийиигэ кыһалҕаларын, социальнай предпринимательствоны, мода индустриятын сайыннарыыны көрүөхтэрэ, о.д.а. санааларын үллэстиэхтэрэ.

Туспа кэҥэтиллибит бырагырааманан «Как живёшь, хозяйка Арктики?» тиэмэҕэ сэһэргэһии буолара күүтүллэр. Манна көс олохтоох дьиэ кэргэттэр боппуруостарын көрүөхтэрэ, үгэстийбит олох тутулун харыстааһын, Арктикаҕа үөрэх, Арктика норуоттарын култуураларын үйэлээх баайын, хотугу үгэстийбит салаалары харыстааһын уонна сайыннарыы, Уүук хоту дойдуга эр киһи доруобуйатын уонна уһун үйэлэниитин туһунан, о.д.а. тиэмэлэргэ киэҥ кэпсэтиилэр ыытыллаллара былааннанар.

Маны таһынан, бэбиэскэҕэ «Законодательная власть и женщина: возможности и перспективы», «Роль женщин – аграрников в производстве сельхозпродукции и в становлении здорового поколения», «Женщины в науке», «Молодежные инициативы: энергия позитива» стратегическай сиэссийэлэр бааллар.

Уһук Илин уокуругун дьахталларын II пуорумун пленарнай мунньаҕын уонна Саха сирин дьахталларын XV сийиэһин түмүгүнэн дьүүллэһиллибит кыһалҕалары быһаарарга уонна туруоруллубут сыалы толорорго рекомендациялардаах икки резолюция ылыллыа.

Санатан эттэххэ, Дьокуускайга Саха сирин үлэһит дьахталларын маҥнайгы сийиэстэрэ 1925 сыл кулун тутар 8 күнүттэн 16-гар диэри тэриллэн ыытыллыбыта. Бу устуоруйаҕа киирбит хамсааһын дьахтар уопсастыбаҕа оруолун үрдэппитэ. Уһук Илин уокуругун дьахталларын I пуорума 2019 с. Читаҕа буолбута. Онно маннык тэрээһини хас иккилии сылга биирдэ ыытар туһунан быһаарыыны пуорум кыттыылаахтара ылыммыттара.

+1
0
+1
0
+1
0
+1
0
+1
0
+1
0
+1
0