Дьиэ кэргэн, таптал уонна бэриниилээх буолуу күнүгэр, Дьокуускай куорат Строительнай уокуругар “Панда и мамонт” диэн сквер арылынна.
Сквер “Норуот бүддьүөтэ” бырайыак чэрчитинэн олоххо киирдэ. Санатан эттэххэ, социальнай бырайыак сүрүн хайысхаларынан: уопсастыбаннай эбийиэктэри өрөмүөннээһин, тутуу. Дьокуускай куорат уокуруктарын, дьон маассабайдык сылдьар сирдэрин тупсарыы. Үөрэххэ, спортка, култуураҕа туһуланар үлэлэри тэрийии буолаллар.
Бүтүн Арассыыйатааҕы бырааһынньыгынан итиэннэ сквер арыллыытынан уокурук олохтоохторун Дьокуускай куорат баһылыга Сардаана Авксентьева итиитик-истиҥник эҕэрдэлээтэ. Кини “Норуот бүддьүөтэ” бырайыагынан дьон сынньанар сирдэрэ тупсарыллалларын, өрөспүүбүлүкэ киинэ сайдан, киэркэйэн иһэрин бэлиэтээтэ.
“Уокуруктарга, микрооройуоннарга, куорат таһыгар олорор сирдэрин-уоттарын тупсарарга, кырасыабай оҥорорго, дьону-сэргэни манньытарга ис сүрэхтэриттэн кыһаллар көхтөөх дьон бааллара наһаа үөрдэр. Кинилэр дьон маассабайдык сынньанар сирдэригэр үөрэтэр, билиини-көрүүнү хаҥатар, култуурунай, спортивнай тэрээһиннэри тэрийэргэ, араас аахсыйалары оҥорорго көхтөөхтүк кытталлар, — диэтэ мэр.
“Панда уонна сэлии” 16 кыбартаал. Тупсаран оҥоруу” бырайыагы көҕүлээччи Афанасий Чириков сквер Дьокуускай куорат дьаһалтатын уонна “Бюджетник” управляющай хампаанньа өйөбүллэринэн олоххо киирбитин бэлиэтээтэ.
—Маннык сквер биһиги уокурукпутугар маассабай бырааһынньыктары, тэрээһиннэри оҥорорбутугар олус наада. “Норуот бүддьүөтүн” көмөтүнэн куораппыт тупсан, киэркэйэн иһэр, — диэтэ. Маны сэргэ, сквер сиригэр-уотугар 100 мас, 100 сибэкки, 100 сэппэрээк олордуллубутун, спортивнай тренажердар туруоруллубуттарын эттэ.
Санатан эттэххэ, “Норуот бүддьүөтэ” 2014 сыллаахха Гражданскай көхтөөх буолуу сылыгар, оччолорго куорат баһылыгынан олорор Айсен Николаев көҕүлээһининэн саҕаламмыта. Куонкурус уокуруктары, куорат тастарын, оҕо былаһааккаларын, норуот маассабайдык сынньанар сирдэрин тупсарарга, тиэргэннэри киэргэтэргэ, тулалыыр эйгэҕэ туһуламмыт тэрээһиннэри тэрийэргэ, о.д.а. уһулуччу суолталаах сыалы-соругу толорорго туһаайыллыбыта.
Дьокуускай куорат уопсастыбаннаһы уонна иһитиннэрэр-биллэрэр сириэстибэлэри кытары хардарыта үлэҕэ Департамена