Дьокуускайга 4 тыһыынча миэстэлээх 10 оскуола тутуллуоҕа, сыл бүтэһигэр өрөспүүбүлүкэҕэ саамай улахан оскуола үлэҕэ киириэҕэ.
Бу туһунан Ил Дархан Айсен Николаев Якутия 24 телеханаалга «Якутия, вперед!» диэн ыам ыйын түмүгүн оҥорор биэриигэ иһитиннэрдэ. Аҕа баһылык бэлиэтээбитинэн, балаҕан ыйын 1-кы күнүгэр диэри киин куорат 11 оскуолатыгар хапытаалынай өрөмүөн ыытыллыаҕа. Быйылгы сыл бүтэһигэр 120 миэстэлээх өрөспүүбүлүкэтээҕи анал коррекционнай оскуола-интэринээт, «Прометей» кыбаарталга 990 миэстэлээх саамай улахан оскуола үлэҕэ киириэхтэрэ. Саҥа оскуоланы тутууга сир тиийбэтинэн сибээстээн, сүрүннээн оскуолаларга эбии тутуулары (пристрой) тутан, оскуола дьиэлэрин иэннэрин кэҥэтиэхтэрэ.
— Саҥа оскуолалары тутан киллэрии — оҕону үөрэтиигэ сонун сүүрээннэри тобулуу. Бу оҕо төрөөбүт тылынан саҥаран үөрэниитин ситиһии. Саҥа тутуллубут оскуолаларга оҕону төрөөбүт тылынан үөрэтэр кылаастар баар буолуохтара, — диэн эттэ Ил Дархан «Якутия 24» телеханаалга.
Елена ПОТОЦКАЯ, «Саха сирэ» хаһыат.
Хаартыска — Андрей Сорокин (СИА).