Билии күнүгэр “Глобальнай үөрэх киинэ” диэн ааттаах гимназия Дьокуускай куорат 203 микрооройуонугар арылынна. Саҥа үөрэх кыһатыгар 32 кылааска 1200 оҕо үөрэнэр буолуоҕа.
Саҥа оскуола үөрэнээччилэрин уонна учууталларын үөрүүлээх тэрээһинигэр өрөспүүбүлүкэ Ил Дархана Айсен Николаев кэлэн эҕэрдэлээтэ. Саха сирин аҕа баһылыга бу оскуоланы тутуу туһунан быһаарыллыы ылынаҕыттан, бэрт кылгас кэм иһигэр тутуллан үлэҕэ киирбитин бэлиэтээн эттэ. Тутууга көҥүл 2019 сылга бэриллибитэ, оттон бу сыл сааһыгар тутуу үлэтэ сүрүннээн түмүктэммитэ.
— Бу олус суолталаах ситиһии, оҕону үөрэтэр тэрилтэлэргэ миэстэ тиийбэтэ куорат биир улахан кыһалҕата этэ. Онон Дьокуускай биир саамай эдэр кыбаарталыгар саҥа оскуола баар буолбута олуһун үөрдэр. Билигин 203-с микрооройуон куоракка оҕо уһуйааннарынан, оскуоланан хаччылыыга бастыҥынан буолла! — диэн Ил Дархан эттэ.
Айсен Николаев куоракка сыл аайы маҥнайгы кылаас үөрэнээччилэрин ахсаана элбээн иһэрин бэлиэтээтэ. Бүгүн Дьокуускайга 5800 оҕо аан бастакытын оскуола боруогун атыллыыллар. Өрөспүүбүлүкэ Арассыыйа Үөрэҕирии министиэристибэтин уонна ВЭБ.РФ судаарыстыбаннай корпорациятын кытта дойдуга бастакынан саҥа үөрэх тэрилтэлэрин тутууга улахан бырайыакка кыттар. Бу бырайыак номнуо куорат хас да оскуолалара киллэриллибиттэрэ. Ил Дархан бэҕэһээ бу күрэх бастакы түһүмэҕин түмүгүн таһаарбыттарын туһунан иһитиннэрдэ. Бу күрэх түмүгүнэн, Дьокуускайга 5 оскуола уонна Жатайга биир оскуола кэлэр үс сылга бу бырагыраама чэрчитинэн тутуллар буолбуттар.
— Бу улахан ситиһии. Бу оскуолаларга хас биирдиилэригэр 990-тан итэҕэһэ суох оҕо үөрэнэр буолуоҕа. Биһиги бэрэсидьиэммит Владимир Путин өйөбүлүнэн, Дьокуускай куоракка үөрэх миэстэтэ тиийбэтин кыһалҕатын тэтимнээхтик быһаарыахпыт диэн эрэнэбин, — диэтэ.
Айсен Сергеевич саҥа үөрэнэ кэлбит маҥнайгы кылаас үөрэнээччилэригэр туйгун үөрэҕи баҕарда уонна оскуолаҕа “Оскуола бибилэтиэкэтин» сэртипикээтин туттарда.
Куорат баһылыга Евгений Григорьев бу сылга Дьокуускайга барыта 50 500 оҕо оскуолаҕа үөрэнэрин туһунан эттэ. Бу куорат саҥа рекорда, ол эрэн хас сыл аайы ортотунан 7 тыһыынча кэриҥэ саҥа үөрэнээччи киирэрэ сабаҕаланар, онон рекорд бүтэһиктээх буолбата чахчы. Онон оскуола тутуута өр сылларга тыын боппуруос буолар. Ил Дархан сорудаҕынан, киин куоракка 2024 сылга диэри 12 саҥа оскуола үлэҕэ киириэхтээх.
«Саха сирэ» хаһыат, edersaas.ru
Хаартыска sakha.gov.ru