Бүгүн, сэтинньи 22 күнүгэр, Дьокуускай куоракка Москватааҕы “ФК Открытие” баан офиһын үөрүүлээх аһыллыыта буолла.
edersaas.ru
Тэрээһиҥҥэ СӨ бырабыыталыстыбатын бэрэссэдээтэлин бастакы солбуйааччы Алексей Стручков кытынна. “Арассыыйа 10 сүрүн бааныгар киирэр “ФК Открытие” баан өрөспүүбүлүкэ экэниэмикэтин сайдыытыгар, судаарыстыбаннай, национальнай бырайыактар туолууларыгар, араас тутууларга кэтэх инвестор кыттыһыытыгар, хамнас төлөбүрүн систиэмэтигэр үлэлэһиэҕэ”, — диэн Алексей Стручков эҕэрдэ тылыгар эттэ.
Баан Арассыыйа үрдүнэн арыйбыт офистарын испииһэгэр Дьокуускай 265-ис куоратынан буолла.
“Аныгы олох ирдэбилигэр эппиэттиир офис арыллан, нэһилиэнньэҕэ тиийимтиэ өҥөнү оҥорон, эрэгийиэн экэниэмикэтин сайдыытыгар үлэлииргэ бэлэммит”, — диэн баан бырабылыанньатын чилиэнэ Александр Пахомов эттэ.
Санатан эттэххэ, СӨ бырабыыталыстыбата “ФК Открытие” бааны кытта тэҥҥэ үлэлиир туһунан сөбүлэҥи балаҕан ыйыгар буолбут Илиҥҥи V экэнэмиичэскэй форумҥа илии баттаспыта.
Судаарыстыбаннай тэрилтэлэргэ кирэдьиит биэрэр кыахтаах Сбербаан уонна ВТБ баан испииһэгэр үсүһүнэн “ФК Открытие” баан эбиллэн, күрэстэһии улаатан, кирэдьиит бырыһыана түһэрэ күүтүллэр.
Ньургуйаана Иванов, edersaas.ru