Бу өрөбүллэргэ, ол эбэтэр балаҕан ыйын 25-26 күннэригэр киин куоракка Тыа хаһаайыстыбатын министиэристибэтин уонна куорат дьаһалтатын тэрийиилэринэн, «Ас-үөл – 2021» дьаарбаҥка ыытыллар.
Быйыл дьаарбаҥка коронавирус дьаҥынан сибээстээн, саҥа киэбинэн тэриллэр. Бастатан туран, санитарнай-сэрэтэр ирдэбил толору тутуһуллар итиэннэ элбэх киһи мустуутун таһаарбат сыалтан, үс былаһаакканан буолар:
– «Кыра баһаарга» (Киров уулусса 12/1, «Кырдьаҕас куорат»); Арктикатааҕы судаарыстыбаннай агротехнологическай университет иннигэр (Сэргэлээх шоссетын 3-с км, 3); уонна Ю.А.Гагарин аатынан Култуура уонна аныгы ускуустуба киинин былаһааккатыгар (Можайскай уулусса 25).
Бэйэлэрин бородууксуйаларын Амма, Булуҥ, Мэҥэ Хаҥалас, Нам, Таатта, Уус Алдан, Усуйаана, Хаҥалас улуустарын хаһаайыстыбалара уонна Дьокуускай куорат хампаанньалара, барыта 60-ча табаары оҥорооччу аҕалбыттар. Сиһилии «Саха сирэ» хаһыат кэлэр нүөмэригэр ааҕыаххыт.
Раиса Сибирякова, «Саха сирэ», edersaas.ru