Дьокуускайга үс күн «Стройиндустрия Севера. Энергетика. ЖКХ» быыстапка үлэлиэҕэ

Сарсыҥҥыттан Дьокуускайга «Кыайыы 50 сыла» спортивнай комплекска сылын аайы ыытыллар үтүө үгэскэ кубулуйбут «Стройиндустрия Севера. Энергетика. ЖКХ» диэн регионнар икки ардыларынааҕы анал быыстапка үлэлиэҕэ.

Александр ТАРАСОВ, «Саха сирэ» хаһыат, https://edersaas.ru

Санатар буоллахха, тэрээһин Саха сиригэр 14-с төгүлүн ыытыллар. Быйылгы тэрээһиҥҥэ 15 регионтан 100-тэн тахса тэрилтэ кыттыаҕа. Кинилэр тутуу матырыйаалларын оҥорууга туох саҥаны киллэрбиттэрин, ититэр ситимҥэ ханнык технологияны туһаммыттарын аҕалан көрдөрүөхтэрэ, анал бырайыактары кэпсиэхтэрэ. Быыстапка кулун тутар 14-16 күннэригэр ыытыллар, киирии босхо.

Владимир Членов, СӨ «Атыы-эргиэн уонна промышленнай палата» бэрэсидьиэнэ:
– Маннык киэҥ далааһыннаах тэрээһин ыытыллара олус наадалаах, көдьүүһэ улахан. Атыттар аныгы технологияны туһанан тугу оҥорбуттарын, айбыттарын көрөн-истэн, наадалааҕын сүһэн ылан, туһаныахпытын наада. Элбэхтэн биири холобурдуур буоллахха, үс сыллааҕыта быыстапкаҕа «Ярославские краски» тэрилтэ кыттыбыта. Ону биһиги уолаттарбыт көрөн-истэн баран, акриловай кыраасканы оҥорон, хайыы-үйэ атыылыы сылдьаллар.