Россия күнүнэн өрөспүүбүлүкэ үрдүнэн, хас куорат, хас улуус, хас нэһилиэк ахсын араас элбэх тэрээһиннэр буоллулар. Киин куоракка бырааһынньыктааҕы дьаһаллар болуоссаттарынан, уокуруктарынан ыытылыннылар. edersaas ru.
«Мин Россиябын» телебырайыак быыстапката
«Россия» телевизионнай ханаал көҕүлээһининэн, былырыын ыам ыйыгар Cевастополь куоракка саҕаламмыт «Мин Россиябын» аахсыйаҕа дойду 15 куоратыттан уонунан тыһыынча киһи кытынна. Бу кэм устата телеханаал Россия араас регионнарыгар тыһыынчанан киһини уһулан, кинилэр үлэлэрин-хамнастарын сырдатта.
Орджоникидзе болуоссатыгар бу аахсыйа чэрчитинэн «Мин Россиябын» хаартыска быыстапката аһылынна. Улахан баннердарга отут киһи, биһиги ортобутугар үлэлии-хамсыы, айа-тута сылдьар дьон хаартыскалара туруоруллубут. Кинилэр истэригэр бааллар – быраас, учуутал, суруйааччы, актер, тутааччы, оробуочай, ыанньыксыт, биэкэр, устудьуон…
Хас биирдии хаартыска киһи дьылҕатынан, үлэтинэн-хамнаһынан куорат уонна өрөспүүбүлүкэ күннээҕи олоҕун сырдатар история кэрэһитэ, бэйэтэ летопись.
Норуоттар доҕордоһууларын параада
Россия Федерациятыгар араас омуктар «Россия норуота!» — дэтэн, биир сомоҕо буолан түмсүүлээхтик олороллорун бэлиэтээн, бу күн бары регионнарга, ол иһигэр биһиги өрөспүүбүлүкэбитигэр, норуоттар доҕордоһууларын параада тэрилиннэ.
Доҕордоһуу болуоссатыгар сарсыарда 11 чаастан национальнай көстүүмнээх дьон – национальнай диаспоралар, общиналар бэрэстэбиитэллэрэ, айар кэлэктииптэр, куорат олохтоохторо уонна ыалдьыттара мустан истилэр. «Ханнык омук суоҕуй?» – диэн ыйытыахха эрэ сөп. Күннэтэ чэчирии сайдар Сахабыт сиригэр Россия элбэх норуоттара: сахалар, нууччалар, хотугу төрүт олохтоох омуктар, итии хааннаах Кавказ дьоно, күннээх Орто Азия бэрэстэбиитэллэрэ, бүрээттэр, тувинецтар… биир иллээх дьиэ кэргэн буолан олороллорун киэн тутта көрөҕүн!
Мустубут дьон хамаанда бэриллээтин кытары, холуонналарынан турунан, өрөгөйдөөх муусука тыаһынан доҕуһуоллатан, куорат киин уулуссатынан хотолдьуһа хааман, Ленин болуоссатыгар кэлэллэр.
Гражданскай уопсастыба институттарын сайыннарыы миниистирэ Сардаана Гурьева:
— Россия күнэ Россия Федерациятыгар олорор бары омуктар сомоҕолоһууларын көрдөрөр. Кэнчээри ыччаппыт күүстээх державаҕа дьоллоохтук олорорун туһугар түмсүүлээх буолуохтаахпыт. Ол иһин, бүгүн уопсастыбаннас көҕүлээһининэн норуоттар доҕордоһууларын параада отуттан тахса региоҥҥа ыытыллар. Бу дьаһал хас биирдии киһиэхэ, кини омугуттан, ханна олороруттан тутулуга суох, Россия норуотун сорҕотун быһыытынан киэн туттар санааны үөскэтиэҕэ.
Үөрүүлээх миитин
Ленин болуоссатыгар параад холуонналара кэлэллэрин кытары, Россия күнүгэр анаммыт үөрүүлээх миитин саҕаланар.
Ил Дархан Егор Борисов лоп-курдук 27 сыллааҕыта, 1990 сыл бэс ыйын 12 күнүгэр, РСФСР норуодунай дьокутааттарын I сийиэһэ Судаарыстыбаннай суверенитет туһунан Декларацияны ылан, демократическай принциптэргэ олоҕурбут саҥа Россия историята саҕаламмытын эттэ. Дойдуга билигин саҥа гражданскай уопсастыба тутуллар, саҥа уопсастыбаннай өй-санаа үөскүүр диэтэ. Саха сирэ элбэх омук иллээхтик олорор, бигэ туруктаахтык сайдар өрөспүүбүлүкэ быһыытынан билиниини ылбытын бэлиэтээтэ. Бырааһынньыгынан эҕэрдэлээтэ, бары саҕалааһыннарга ситиһиилэри баҕарда, өссө түмсүүлээх буоларга ыҥырда.
Үлэ Дьоруойа, Хаҥалас улууһун лесничествотын салайааччы Варвара Устинова кэс тылын устудьуоннар тутар этэрээттэрин байыастарыгар анаата:
– Россия күнүгэр устудьуоннар тутар этэрээттэрин үлэтигэр старт бэриллэрэ мээнэҕэ буолбатах. Эдэр дьон маннык этэрээттэргэ сылдьаҥҥыт дойдуну сайыннарыыга кылааккытын киллэрэҕит, үлэҕэ үөрэнэҕит, тэрийэр дьоҕургутун сайыннараҕыт, – диэтэ.
Салгыы миитин кыттыылаахтарын Россия дзюдоҕа федерациятын вице-президенэ Тамерлан Тменов, «Эдэр армия» Саха сиринээҕи салаатын салайааччы Артём Абрамов эҕэрдэлээтилэр.
Бу күн Российскай Федерация гражданиннара буолбуттарын туоһулуур пааспары ылбыт эдэр дьоҥҥо икки хос үөрүүлээх буолла. Куорат оскуолаларын бастыҥ үөрэнээччилэригэр, өрөспүүбүлүкэтээҕи олимпиадалар, научнай-практическай конференциялар кыайыылаахтарыгар Элеонара Варламоваҕа, Полина Вороноваҕа, Юрий Говоровка уо.д.а. Ил Дархан Российскай Федерация гражданинын пааспардарын туттарда!
15 ыалга саҥа дьиэ күлүүһэ
Строительнай уокурук олохтоохторугар дьоһун үөрүү тосхойдо: архитектура уонна тутуу комплексын миниистирин э.т. Павел Аргунов, куорат баһылыгын бастакы солбуйааччы Дмитрий Садовников уонна «Трансстрой» ХЭТ дириэктэрэ Денис Мункоев Дьокуускай уулусса 2/17 №-гэр үлэҕэ киллэриллибит саҥа дьиэ кыбартыыраларын күлүүстэрин туттардылар.
Дьоро күн дьоллоохторунан «2013-2017 сс. «Дьокуускай куорат» куораттааҕы уокурук нэһилиэнньэтин олорор дьиэнэн хааччыйыы» муниципальнай бырагыраама «2013-2017 сс. хаарбах дьиэттэн дьону көһөрүү» хос бырагырааматынан эргэ дьиэлэртэн көһөрүллүбүт 15 ыал буолла.
Капиталина Алексеева:
— Биһиги өр сылларга Көтөр фабрикатыгар баар хаарбах дьиэҕэ олорбуппут. Бэс ыйын 12 күнүгэр, Россия күнүгэр, үс хостоох кыбартыыра күлүүһүн туттарыахпыт диэбиттэригэр наһаа соһуйбуппут, улаханнык эрэммэтэхпит. Үөрүүбүт муҥура суох, махтал! Россия күнүнэн!
