Дьокуускайга үөрэх тэрилтэлэригэр куттал суох буолуутун хааччыйыы үлэтэ күүһүрдэ
Пермь университетыгар тахсыбыт быһылаан кэнниттэн, киин куорат баһылыга Евгений Григорьев социальнай эбийиэктэр көмүскэллээх буолууларын саҥаттан бэрэбиэркэлииргэ сорудахтаата.
edersaas.ru
– Бэрэбиэркэ түмүгүнэн көстүбүт итэҕэстэри туоратарга кэлэр сыл бүддьүөтүн былаанныырга үп көрүөхпүт, – диэтэ баһылык нэдиэлэтээҕи планеркаҕа.
«Үөрэх управлениета» муниципальнай хаһыанай тэрилтэ үлэ көмүскэлигэр уонна куттал суох буолуутугар отделын начальнига Евгений Затеев управление иһинэн киирэр үөрэх тэрилтэлэрэ чинчийиллибиттэрин, куттал суох буолуутун пааспардара КСБФУ, Росгвардия, ЫБММ территориятааҕы уорганнарын кытары сөбүлэһиллибиттэрин туһунан эттэ. Түмүккэ итэҕэс быһыытынан детсаадтарга уонна эбии үөрэхтээһин кииннэригэр охрана суоҕун; видеокэтээн көрүү аппаратурата эргэрбитин, сорохторго видеохаамыра итэҕэһин ыйда. Кини этэринэн, өрөмүөн оҥоруу уонна үөрэх тэрилтэлэрин тиэргэннэригэр видеохаамыралары периметрдэринэн туруоруу былааннанар эбит.
– Билигин муниципальнай үөрэх тэрилтэлэригэр куттал суох буолуутун хааччыйыы үлэтин былаана (суол хаартата) оҥоһулла сылдьар, ол иһигэр детсаадтарга эбии домофоннары туруоруу киллэрилиннэ, – Евгений Затеев.
Үлэ Арассыыйа Бырабыыталыстыбата 2019 сыл атырдьах ыйын 2 күнүгэр таһаарбыт «Арассыыйа федерациятын Үөрэҕин министиэристибэтин итиэннэ бу министиэристибэ ыытар үлэтигэр-хамнаһыгар сыһыаннаах эбийиэктэр (территориялар) терроризмтан көмүскэллээх буолууларын ирдэбилин итиэннэ бу эбийиэктэр (территориялар) куттала суох буолууларын пааспарын бигэргэтэр туһунан» диэн ыйааҕар олоҕуран тэриллэр. Бу туһунан киин куорат дьаһалтатын уопсастыбаннаһы уонна иһитиннэрэр-биллэрэр сирисэтибэлэри кыттары үлэҕэ департамена иһитиннэрэр.
Раиса Сибирякова, «Саха сирэ» хаһыат, edersaas.ru