«Прометейчик» оҕо саадыгар — эбии бөлөхтөр

Ааптар: 
Бөлөххө киир:
Бүгүн, ахсынньы 26 күнүгэр, СӨ Ил Дархана Айсен Николаев Дьокуускай куорат 18 №-дээх «Прометейчик» оҕо саадыгар сырытта. Кэлэктииби эбии бөлөхтөр арыллыбыт үөрүүлээх күннэринэн эҕэрдэлээтэ.
Бу «Демография» национальнай бырайыак иитинэн, федеральнай уонна өрөспүүбүлүкэ бүддьүөттэрин өйөбүлүнэн, судаарыстыбаннай-чааһынай бииргэ үлэлээһин бырагырааматынан тутулунна.
119 оҕо сылдьарыгар суоттаммыт 1184 квадратнай миэтэрэ иэннээх оҕо саадыгар саала, аһылыгы бэлэмниир блок, мэдиссиинэ хоһо, Монтессори оҕону эрдэттэн сайыннарыы устуудьуйата, сенсорнай хос бааллар.
Хас эмэ сыл анараа өттүгэр толкуйдаммыт былаан туолан олоххо дьэ киирдэ. Билигин манна балтарааларыттан сэттэлэригэр диэри саастаах оҕолор сылдьыахтара, дьарыктаныахтара. Бу тутааччылар, үлэһиттэр, оҕо саадын салалтатын уонна кэлэктиибин улахан үлэтэ, — диэн Айсен Николаев эҕэрдэлээтэ.
Кини РФ Бырабыыталыстыбатыгар, Дойду бэрэсидьиэнигэр «Демография» национальнай бырайыагы олоххо киллэрэргэ үбүнэн-харчынан өйөбүллэригэр махтанна.
2020 сыл төһө да уустуктардаах буолбутун иһин, өрөспүүбүлүкэ социальнай сайдыытын тохтоппотубут. Оскуолалар, оҕо саадтара былаан быһыытынан тутуллан иһэллэр. Үүнэр сылга өссө элбэх тутуллуоҕа диэн эрэнэбин. 12 оскуола уонна 15 оҕо саада былааннанар, — диэти Ил Дархан.
Дьокуускай куорат баһылыга Сардаана Авксентьева дьааһыла саастаах оҕолор бөлөхтөрө аһыллаллара төрөппүттэргэ улахан үөрүүлээҕин бэлиэтээтэ.
Бары көмөлөөн уонна РФ Бырабыыталыстыбата өйөөн, маннык бэртээхэй оҕо саада аһыллара ситиһилиннэ, — диэтэ.
«Прометей» хампаанньа генеральнай дириэктэрэ Григорий Сальва символ күлүүһү оҕо саадын сэбиэдиссэйигэр Мария Прокопьеваҕа туттарарыгар, Ил Дархан Айсен Николаевка өйөбүлүн иһин махтанна уонна кэлэр сылга хампаанньа өссө биир социальнай эбийиэги — оскуоланы тутан бүтэрэр былааннааҕын иһитиннэрдэ.
Оҕо саадын кэлэктиибин, кырачааннарын уонна төрөппүттэрин ааттарыттан сэбиэдиссэй Мария Прокопьева тыл эттэ. Кини үүнэр көлүөнэҕэ болҕомтолорун уонна кыһамньыларын иһин өрөспүүбүлүкэ салалтатыгар уонна эдэр төрөппүттэр социальнай үлэхтэрин толорбуттарын иһин тутааччыларга махтанна.
+1
0
+1
0
+1
0
+1
0
+1
0
+1
0
+1
0