Дьокуускайга оскуолаларга хапытаалынай өрөмүөннэр саҕаланнылар

Дьокуускайга оскуолаларга хапытаалынай өрөмүөннэр саҕаланнылар.

Дьокуускайга 11 оскуолаҕа хапытаалынай өрөмүөнү ыытарга муниципальнай хантараактар түһэрсиллибиттэр. Быйылгы сылга 10, 20, 21, 23, 27, 31, 33, 36 №-дээх оскуолалар, Саха политехническэй лиссиэйэ, Дьокуускай куораттааҕы национальнай гимназия, Марха 1 №-дээх оскуолата испииһэккэ бааллар.

Өрөмүөн үлэлэрэ сорох оскуолаларга муус устар 15 күнүттэн саҕаламмыттар. Оттон хапытаалынай өрөмүөн бу оскуолаларга атырдьах ыйын ортотугар бүтүөхтээх.

«Главстрой» МКУ иһитиннэрбитинэн, ыам ыйын 4 күнүнээҕи туругунан, тутар-монтажтыыр үлэлэр 10, 20, 21, 23, 27, 33 №-дээх оскуолаларга, национальнай гимназияҕа, Мархаҕа 1 №-дээх оскуолаҕа, Саха политехническэй лиссиэйгэ саҕаламмыттар. Оттон 36 №-дээх оскуолаҕа ыам ыйын 15 күнүн кэнниттэн саҕаланар.

Хапытаалынай өрөмүөнү ыытарга 809 мөл.солк. көрүллүбүт, итинтэн 720 мөл. солк. тахсата федеральнайтан, 89 мөл.солк олохтоох бүддьүөттэн. «Главстрой» МКУ бэлиэтээбитинэн,

тутар-монтажтыыр үлэ улааттаҕына, сыана эмиэ уларыйыан сөп.

Үөрэх управлениетыттан, үөрэх дистанционнай киэбинэн ыытыллар түгэнигэр, чэпчэтиинэн туһанар категорияҕа түбэһэр 5-11 кылааска үөрэнээччилэрэ «сухой паегунан» хааччыллыахтара диэн иһитиннэрэллэр.

Дьокуускай куорат дьаһалтатын пресс-сулууспата