Дьокуускайга оскуола үөрэнээччилэригэр айан саҥа каартатын киллэрэн эрэллэр
Үөрэх дьыла саҕаламмытынан сибээстээн, куорат 1-4 кылааһын үөрэнээччилэрэ маршрутнай автобуһунан тырааныспар саҥа каартатынан босхо айанныахтарын сөп.
edersaas.ru
Саҥа каартаҕа оҕо хаартыската, аата-суола, ханнык үөрэх тэрилтэтигэр үөрэнэрэ ыйыллыаҕа. Инньэ гынан, өскөтүн, оҕо каартатын сүтэрэр түгэнигэр үһүс киһи кыайан туһаммат буолуоҕа. Каартаны илдьэ сылдьааччы туһунан информацияны хомуйууну уонна автоматизированнай систиэмэ анал бааныгар тиэрдиини үөрэх тэрилтэлэрэ хааччыйыахтара. Каартаны төрөппүттэр (сокуоннай бэрэстэбиитэллэр) бэйэлэрин суоттарыгар атыылаһаллар. Оттон босхо айанныыр харчыларын дьону таһааччылар ороскуоттарын төнүннэрии субсидиятын быһыытынан куорат бүддьүөтэ уйунуоҕа.
Бу иннинэ, 2018 сыл муус устар 1 күнүттэн автобуһунан босхо айанныыр оҕолор тырааныспар каартатын сэргэ эбии хаартыскалаах аата-суола, ханна үөрэнэрэ уонна каартатын нүөмэрэ толору ыйыллыбыт бейджиги көрдөрөллөрө ирдэнэрэ. Билигин ити информация каартаҕа бэйэтигэр киллэриллиэҕэ.
Оскуола үөрэнээччилэригэр аналлаах тырааныспар каартатын ылыы туһунан оскуолаҕыт салалтатыттан ыйыталаһыҥ.
Дьокуускай куорат уокуругун дьаһалтатын пресс-сулууспата.