Бүгүн, атырдьах ыйын 2 күнүгэр, Дьокуускайга Орджоникидзе аатынан болуоссакка үгэскэ кубулуйбут ВДВ күнүн бэлиэтээтилэр.
Десантниктары бырааһынньыгынан Дьокуускай куорат дьаһалтата, «Биир ньыгыл Арассыыйа» баартыйа, «Молодая Якутия» байыаннай-патриотическай кулууп, ыччат уонна уопсастыбаннай тэриллиилэр эҕэрдэлээтилэр. Байыаннай дьайыылар бэтэрээннэрин аатыттан бэрэссэдээтэл Николай Гребенников тыл эттэ.
— Биһиги сыллата бу бырааһынньыгы бэлиэтиирбит олус үчүгэй. Маннык дьон кэккэтигэр киирэр олус ыарахан, онон бүгүн Аҕа дойду дьиҥнээх көмүскээччилэрэ муһуннулар, — диэн Гребенников байыаннай комиссариат аатыттан тыл эттэ уонна махтал суруктары туттарда.
«Бүгүн салгыҥҥа сэриилэһэр аармыйа тэриллибитэ 92 сыла буолла. Хас биирдии киһиэхэ доруобуйаны, эйэлээх халлааны баҕарабын. Сыллата бу күҥҥэ Саха сирин десантниктара аһымал аахсыйалары тэрийэллэр. Кыаммат ыалларга бородууктанан көмөлөһөбүт. Быйыл Украинаҕа байыаннай эпэрээссийэҕэ тыыннара быстыбыт уонна бааһырбыт саллааттар дьиэ кэргэттэригэр көмөлөһүөхпүт. Итиэннэ кылаабыһаҕа сибэкки дьөрбөтүн ууруохпут», — диэн десантниктар сойуустарын бэрэссэдээтэлэ Сергей Андреасян эттэ.