Дьокуускай куоракка оптуобустары истэри-тастары дезинфекциялыыр үлэлэр ыытыллаллар.
Былааннаммыт санитарнай үлэлэр Роспотребнадзор рекомендациятынан коронавирус дьаҥын бохсор сыаллаах-соруктаах тэриллэллэр.
Бэс ыйын 5 күнүгэр «ЯПАК» МУТ уонна «СоюзАвто» оптуобустарын дезинфекциялааһын ыытылынна.
«СоюзАвто» салайааччыта Андрей Косицкай хас биирдии оптуобус бүтэһик тохтобулга тиийдэҕин ахсын, ааннар тутаахтара, киирэргэ-тахсарга тутуһар сирдэр, валидатордар сууйуллан-сотуллан, дезинфекцияланан иһэллэрин иһитиннэрбит.
—Оптуобус хас биирдии суоппарыгар мааскалаах, ону сэргэ, дьаҥы-дьаһаҕы бохсорго анаан дезинфекциялыыр сириэстибэлээх. Бу тэрээһиннэр Роспортребнадзор бары ирдэбилигэр сөп түбэһэллэр. Бүгүн, сарсын санитарнай үлэлэр толору ыытыллаллар, — диэн эппит. Дезинфекциялыыр үлэлэр маны сэргэ, өссө тустаах тэрилтэлэргэ уонна сирдэригэр-уоттарыгар ыытыллыбыттар.
Бу туһунан Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытары хардарыта сибээстээх үлэҕэ Департамена иһитиннэрэр.