Бу дьыл кулун тутар 17 күнүгэр сарсыарда 04.00 чаас саҕана силиэстийэ уорганнарыгар иһитиннэрии киирбитэ. Дьокуускай куорат Кузьмин уулуссатыгар оҕо былаһааккатыттан дьахтары биир киһи күүһүнэн массыынаҕа олордон, илдьэ барбытын туһунан.
Тута процессуальнай бэрэбиэркэ саҕаламмыта. Сотору бириэмэнэн эмсэҕэлээбит дьахтартан бэйэтиттэн сайабылыанньа киирбитэ. Күүһүлээбиттэрин туһунан.
Суһал-силиэстийэлиир тэрээһиннэр кэмигэр Росгвардия уонна полиция оперативниктара бу буруйу оҥорууга уорбаланааччыны туппуттара — Орто Азия дойдутуттан төрүттээх киһийдэх эбит. Маны сэргэ, силиэдэбэтэллэр бу буруйу оҥорууга сыһыаннаан, өссө икки киһини эмиэ бэрэбиэркэлииллэр.
Бу чахчынан «Күүһүлээһин» уонна «Киһини уоруу» ыстатыйаларынан холуобунай дьыала тэриллибитэ.
Онтон ити күн киэһэтигэр киин куорат Комсомольскай болуоссатыгар көҥүлэ суох, стихийнэй миитин тэриллибитэ. Дьон миграннар сокуону кэһиилэрин, буруйу оҥорууларын утары санааларын этээри мустубуттара.
Манна өрөспүүбүлүкэ баһылыгын уонна бырабыыталыстыбатын дьаһалтатын салайааччыта Федор Борисов, СӨ Ис дьыалаҕа миниистирин солбуйааччы Константин Неустроев, ИДьМ уопсастыбаннай бэрээдэги араҥаччылааһыҥҥа начальнигын солбуйааччы Олег Лебедь мустубут дьоҥҥо санааларын тиэрдибиттэрэ.
Ол түмүгэр, бүгүн, кулун тутар 18 күнүгэр, «Триумф» спортивнай комплекс дьиэтигэр киэһэ 20.00 чаастан ити быһылаанынан сибээстээн, көҥүллэммит мунньах буолар.
Биһиги корр., «Саха сирэ» хаһыат, edersaas.ru
Хаартыскалар уонна видео: РФ СК ССУ, news.ykt.ru, социальнай ситимнэртэн.