Дьокуускайга олорор улуустар түмсүүлэрэ Айсен Николаевы өйөөтүлэр

Бу күһүн, балаҕан ыйын 9 күнүгэр, Саха Өрөспүүбүлүкэтин Ил Дарханын талар улахан эппиэтинэстээх, барыбытын долгутар быыбар буолар. Ол чэрчитинэн, бэс ыйын 29 күнүгэр мустан мунньахтаан Ил Дархан дуоһунаһыгар кандидат Айсен Сергеевич Николаевы быыбарга өйүүргэ быһаардылар.

Кыттыыны ыллылар: Дьокуускай куоракка түөлбэлээн олорор улуустар землячестволара, түмсүүлэр, национальнай общиналар.

Мунньахха бары биир санаанан Айсен Сергеевич Николаев өрөспүүбүлүкэбит сайдыытыгар туруулаһан үлэлии сылдьарын үрдүктүк сыаналаатылар уонна быыбарга өйүүр бөлөхтөрү тэрийэн, улуустар аайы штабтары үлэлэтэргэ сүбэлэстилэр.

«Бары биир сомоҕо буолан, билиҥҥи балысхан сайдыылаах үйэҕэ хас биирдии өрөспүүбүлүкэ олохтооҕо үчүгэй туруктаах, үлэлээх буоларын туһугар күүһүн, кыаҕын, бары билиитин туһанан, барыбытын түмэн үлэлиэҕэ диэн, Айсен Николаевы быыбарга өйүүргэ!» — диэн түмүккэ ыҥырыы таһаардылар.

Анжелика Алексеева.