Дьокуускайга биэс тыһыынча туоннаҕа тиийэ оҕуруот аһа хаһааныллар ыскылаата саҥардыллар.
Андрей Тарасенко өрүс пуордун таһаҕас терминалын оройуонугар, оҕуруот аһын уонна хортуоппуйу тутар, ыытар сирдэригэр биэс тыһыынча туонна оҕуруот аһын хаһаанар сири саҥардан оҥорууну билистэ. Маннык хаһаанар сир өрөспүүбүлүкэҕэ соҕотох. Ыскылааты саҥардан биэрии аска-үөлгэ сыананы бигэтитэргэ уонна олохтоох оҥорон таһаарааччылары өйүүргэ кыаҕы биэриэ.
2020 сыллаахха ыскылаакка күрүөтэ-хаһаата монтажтаммыта уонна хортуопуйу хаһаанарга анал сир оҥоһуллубута. «Якутопторг» генеральнай дириэктэрэ Николай Алексеев кэпсээбитинэн, бу тыа хаһаайыстыбатын олохтоох кэпэрэтииптэриттэн элбэх хортуоппуйу атыылаһарга уонна аһы-үөлү барытын хоту оройуоннарга, Дьокуускай сиригэр-уотугар халбаҥнаабат сыананан ыытарга кыаҕы биэрэр. 2021-2022 сылларга оҕуруот аһын уонна фруктаны туспа хаһаанар сири оҥоруу, ону сэргэ холодьниктары туруоруу былааннанар.
2021 сылга навигацияҕа барыта 4870 туоннаттан тахса аһы-үөлү тиэрдии былааннанар.
Ил Дархан Айсен Николаев сорудаҕынан Арктика оройуоннарыгар тэриллэр атыы-эргиэн логистическай кииннэригэр миэстэтигэр ас-үөл сибиэһэй буоларын хааччыйыы, хаһааныы, ону сэргэ, тиэйии, тиэрдии тэриллиэ.