Балаҕан ыйын 2 күнүгэр Дьокуускайга бырааттыы Гаврил уонна Роман Дмитриевтэр чиэстэригэр уолаттарга көҥүл тустууга өрөспүүбүлүкэтээҕи турнир аһыллыытынан, Туймаадаҕа Эдьигээн оройуонун күннэрэ саҕаланнылар. edersaas.ru
Бу күн сарсыарда 10 чаастан Эдьигээн киэн туттуута – олимпийскай чөмпүйүөн Роман Дмитриев аатын сүгэр өрөспүүбүлүкэтээҕи Олимпийскай резервэ училищетын тустуу саалатыгар Саха сирин 9 улууһуттан — Амматтан, Алдантан, Аллайыахаттан, Бүлүүттэн, Сунтаартан, Уус Алдантан, Чурапчыттан, Өймөкөөнтөн, Эдьигээнтэн уонна Дьокуускайтан, 3 № -дээх оҕо спорт оскуолатыттан (Дьокуускай) барыта 117 эдэр тустуук муһунна.
Биллэрин курдук, Роман Дмитриев бирииһигэр тустуу турнира 1980-c сыллартан саҕалаан ыытыллар, республикаҕа биллэр тустууктар күөн көрсүбүт күрэхтэринэн буолар. Ол кэмтэн ыла турнир биографията, географията кэҥээн иһэр. Ол туһунан быйылгы турнир аһыллыытыгар Эдьигээн эбэҥки национальнай оройуонун баһылыга Алексей Мандаров бэлиэтээн эттэ. Ол курдук, кини Роман Дмитриев Олимп саамай үрдүкү чыпчаалыгар тахсыбыта 45 cыла туолар күнүгэр Дьокуускайга киниэхэ анаан пааматынньык, сквер аһыллыбытын уонна бүгүн бу турнир саҕаламмытын бэлиэ түгэн быһыытынан бэлиэтээтэ. Баһылык бу турнирынан Дьокуускайга Эдьигээн күннэрэ саҕаланан, үгүс киһи тоҕуоруһан, үрдүк таһымнаахтык барарыгар баҕарда уонна бары тэрээһиннэргэ көхтөөхтүк кыттарга ыҥырда. Маны таһынан, турнир аһыллытыгар ОРУ директорын үөрэххэ солбуйааччыта Нина Дьячковская, көҥүл тустууга аан дойду призера, Азия чемиона Леонид Спиридонов, Эдьигээн нэһилиэгин баһылыга Василий Сорокин, турнир кылаабынай судьуйата, норуоттар икки ардыларынаҕы кылаастаах судьуйа Аркадий Тастыгин тыл этэн, эдэр тустууктарга ким күүстээх, бэлэмнээх кыайдын диэн ситиһиилэри баҕардылар уонна Роман, Гаврил Дмитриевтэр курдук Олимп чыпчаалларыгар тиийэллэригэр алгыс тылларын анаатылар.
Турниры тэрийээччилэринэн буолаллар Эдьигээн эбэҥки национальнай оройуон дьаһалтата, республикатааҕы Олмпийскай резервэ училищата (директор А.А.Филиппов).
Турнир уопсайынан биир күн иһигэр икки көбүөрүнэн, 10 ыйааһынынан барда. Тустууктар бу турнирга ох курдук оҥостон кэлбиттэрэ көстөр. Тоҕо диэтэргит бу турнирга кыттыбыт уолаттар аны аҕыйах хонугунан буолуохтаах Боотурдар оонньууларыгар хаттаан көрсүөхтэрэ турдаҕа, онон бүтэһиктээх кыаҕы тургутуу, бэйэ бэйэни билсиһии буолла диэххэ сөп. Онон полуфиналга, финалга киирсиилэр бэрт сытыытык бардылар.
Турнир түмүгүттэн кылгастык. 28 кг. 2004-2005 с.т. Дьулус Петров (Хаҥалас)- 1 м., Максим Егоров (Дьокуускай) – 2 м., Виктор Иванов (Амма) — 3 м. 32 кг. 2004-2005 с.т. Мичил Мандаров (Чурапчы)- 1 м., Эрик Максимов (Чурапчы) — 2 м., Арсен Кондратьев ( Хаҥалас) – 3 м. 35 кг. 2004-2005 с. т.. Петр Гуляев (Мэҥэ-Хаҥалас)- 2 м., Владислав Макарцов (Чурапчы) – 3 м. 35 кг. 42 кг. 2002-2003 с. т. Сергей Собакин (дьокуускай) – 1 м., Ян ВАсильев (Ньурба) -2 м., Дьулустан Максимов ( Чурапчы)- 3 м. 50 кг 2002-2003 с. т. Айсен Алексеев (Эдьигээн) – 1 м., Алексей Пахомов (Хаҥалас) – 2 м., Вадим Тастыгин (Мэҥэ-Хаҥалас) – 3 м. 54 кг. 2002-2003 с.т. Николай Сыромятников (Эдьигээн) – 1 м., Николай Спиридонов ( Чурапчы)- 2 м., Белолюскай Айтал (Мэҥэ-Хаҥалас) -3 м. 50 кг. 2000-2001 с.т. Айсен Никифоров (Бүлүү) -1 м., Дмитрий Илларионов (Чурапчы)- 2 м., Алксей Андреев ( Мэҥэ-Хаҥалас) — 3 м. 54 кг. 2000-2001 с.т. Уйгулан Иванов ( Мэҥэ-Хаҥалас)- 1 м., Василий Яковлев ( Мэҥэ-Хаҥалас) -2 м., Айаал Белолюбскай ( Дьокуускай) — 3 м. 58 кг. 1999 с.т. Алексей Копылов (Мэҥэ-Хаҥалас) – 1 м., Сергей Спиридонов (Сунтаар) -2 м., Гаврил Макаров (Чурапчы) — 3 м. 63 кг. 1999 с.т. Константин Капрынов (Чурапчы)- 1 м., Егор Герасимов (Сунтаар) – 2 м., Нил Евсеев ( Хаҥалас) -3 м.
Түмүккэ, бары чемпионнарга, призердарга харчынан ботуччу бириэмийэ, грамота уонна саамай сыаналааҕа — бырааттыы Роман, Гаврил Дмитриевтэр турнирдарын кыайыылааҕын мэтээллэрэ туттарылыннылар. Харчынан бириэмийэ кээмэйэ: бастаабыттарга – 10 тыһ. солк., иккистээбиттэргэ – 7 тыһ. солк., үһүстэргэ – 5 тыһ. солк. Харчынан бириистэри Эдьигээн эбэҥки национальнай оройуонун дьаһалтата үбүлээтэ.
Алексей МАТВЕЕВ.
