СӨ Үөрэх министиэристибэтин пресс-сулууспата иһитиннэрбитинэн, коронавирус дьаҥа тарҕаныытын куттала суоһуурунан сибээстээн, оҕолор күнүскү лааҕырдарын үлэтэ өрөспүүбүлүкэ киин куоратыгар тохтоото.
Дьокуускай куоракка үөскээбит уустук эпидемиологическай быһыыга-майгыга, коронавирус дьаҥа (COVD- 19) тарҕаныытын бохсор туһуттан, Роспотребнадзор управлениетын сүбэтинэн, оҕо күнүскү лааҕырдарын үлэлэрэ бобулунна. Куорат таһынааҕы лааҕырдар, Роспотребнадзор сөбүлэҥ биэрдэҕинэ, бэс ыйын 15 күнүттэн аһыллан, бары санитарнай нуорманы тутуһан үлэлииллэрэ былааннанар.
Өрөспүүбүлүкэҕэ үчүгэй санитарнай-эпидемиологическэй түмүгү ылан, бүгүҥҥү күҥҥэ 187 күнүскү лааҕыр аһыллан үлэлии турар. Лааҕырдар Абый, Алдан, Анаабыр, Аллайыаха, Булуҥ, Нам, Ньурба, Нерюнгри, Кэбээйи, Өймөкөөн, Өлүөхүмэ, Ленскэй, Мииринэй, Томпо, Усуйаана, Уус Маайа оройуоннарыгар үлэлииллэр.
«Ытыктабыллаах төрөппүттэр! Оҕону сынньалаҥҥа ыытаргытыгар, хайаан да лааҕыр Саха сирин лааҕырдарын реестэригэр киллэриллибитин бэрэбиэркэлээҥ. Бу испииһэккэ киирбит эрэ лааҕырдар лицензиялаахтар, хонтуруоллуур уорганнар бэрэбиэркэлэрин ааспыттарын бигэргэтэр докумуоннаахтар.
Реестэргэ лааҕыр толору аата, ханнык хайысханан үлэлиирэ, бас билии формата, аадырыһа, салайааччыларын туһунан иһитиннэрии уонна билсэр төлөпүөннэр ыйыллаллар диэн министиэристибэ үлэһиттэрэ болҕомтолоох буоларга ыҥыраллар.
Өрөспүүпүбүлэ иһигэр үлэлиир оҕо сынньалаҥын лааҕырдарын реестрдэрин бу сайтка киирэн көрүөххэ сөп: саха-отдых.детей.рф.
Надежда Ильина, «Саха сирэ» хаһыат, edersaas.ru
Хаартыска СӨ Үөрэх министиэристибэтин саайтыттан