Дьокуускайга оҕо сынньалаҥын тэрийэр лааҕырдар үлэлииргэ бэлэмнэнэллэр

Дьокуускай таһынааҕы оҕо сайыҥҥы сынньалаҥын лааҕырдара оҕолору ыларга бэлэмнэнэллэр. Ол гынан баран, бу коронавирус балаһыанньатыттан тутулуктаах.

Өскөтүн хааччахтаныы эрэсиимин сымнатар миэрэлэр үһүс түһүмэхтэрэ ылылыннаҕына, куорат таһынааҕы «Радуга», «Бинго», «Спутник», «Родничок» лааҕырдар үлэлиэхтэрэ диэн Дьокуускай куорат иһитиннэрэр-биллэрэр сириэстибэлэри уонна уопсастыбаннаһы кытары үлэҕэ департамена суруйар. Лааҕырдарга барыта 327 оҕо сылдьара былааннанар.

—Санитарнай ирдэбиллэр тутуһуллуохтара, — диэн үөрэх управлениетын исписэлииһэ Матрена Гуляева иһитиннэрэр. Маныаха штатынан 146 киһи үлэлиэхтээх. Итиннэ педагогтар, мэдиссиинэ эйгэтин үлэһиттэрэ, аһы-үөлү бэлэмнээччилэр уо.д.а. киирэллэр. Лааҕырга үлэлиэхтээх дьон бары анаалыстары туттараллар. Коронавирустаабыттары кытары хантаактаах оҕолортон эмиэ анаалыс түмүгэ ирдэнэр. Маны сэргэ, лааҕырдар дезинфекциялыыр сириэстибэлэринэн, антисептиктаах дозатордарынан, термометрдарынан, бытыылкалаах ууларынан хааччыллаллар. Санитарнай үлэлэри ыытарга, дератизацияҕа, акарициднай үлэҕэ дуогабардар түһэрсиллибиттэр.

Бэлиэтииллэринэн, хааччахтыыр миэрэлэр уһулуннахтарына, быһа холуйан, от ыйын 27 күнүттэн атырдьах ыйын 1 күнүгэр диэри лааҕырдарга оҕолору ылыы саҕаланыахтаах.

Хаартыска: SakhaLife ылылынна