Уопсастыба

Дьокуускайга ньиэп тохтуутун бохсор үлэҕэ үөрэх буолла

Бэҕэһээ, балаҕан ыйын 22 күнүгэр, Саха сиригэр ньиэп уонна ньиэп бородуукталара тохтууларын бохсорго, содулларын туоратарга ыстаабынан биир кэлим үлэҕэ Бүтүн Арассыыйатааҕы үөрэх буолан ааста.

edersaas.ru

Манна мустубут дьоҥҥо «Саханефтегазсбыт»нефтебазатыттан бэнсиин тоҕуннаҕына тугу гыныахха диэн холобурдааһынтан үөрэҕи саҕалаабыттар. Тэрээһиҥҥэ 190-тан тахса киһи уонна 40-тан тахса тиэхиньикэ кытынна диэн СИА кэпсиир.

Бэлэмнэниигэ РФ ЫБММ Саха сиринээҕи управлениетын сүрүн салалтата, Росгвардия, Дьокуускайдааҕы нефтебаза баһаарынай чаастара, «Сервис промышленной безопасности» ХЭТ, МЧС, «Саханефтегазсбыт» АХ бэрэстэбиитэллэрэ, уо.д.а. кыттыыны ылбыттар.

Уоту бохсор, умулларар араас үөрэх ыытыллыбыт, холобур, уоту салгыы ыыппат курдук күүгэнинэн ыстарыы, мэһэй оҥоруу, о.д.а. Нефтебаза саахал кэмигэр ыҥыраллар ыстааты таһынан хамаандата тохтубут бэнсиини суһаллык хайдах суох оҥоророру көрдөрбүттэр. Үөрэх тиһэх түһүмэҕэр, тохтубут уматык Өлүөнэ өрүскэ киирбэтин туһугар боновай харгыс тутуута ыытыллыбыт.

— Ыксаллаах быһыы-майгы үөскээбит кэмигэр хамаандалар бэйэ-бэйэлэрин кытта хайдах сибээстэһэн тэҥҥэ үлэлииллэрин тургутан көрдүбүт, — диэбит «Саханефтегазсбыт» сүрүн инженерэ Эдуард Чикачев.

— Маннык үөрэх сыл аайы ыытыллар. Бу туһалааҕа, үлэһиттэргэ көмөлөөҕө биллэр, — диэн ис сулууспа подполковнига, РФ ЫБММ Саха сиринээҕи управлениетын баһаары утары үлэҕэ салаатын начаалынньыга Максим Денисов эппит.

Ыстаап үөрэҕэ балаҕан ыйын 21-22 күннэригэр Арассыыйа бары эрэгийиэннэригэр ыытыллыбыт.

Егор Карпов, «Саха сирэ» хаһыат, edersaas.ru

0
0
Telegram @edersaas20

Добавить комментарий