Дьокуускай куорат уокуругун оскуолаларыгар 2021-2022 үөрэх дьылыгар 1 кылааска сурутуу 2021 сыл муус устарыттан саҕаланыаҕа. Ити туһунан Эдэр саас саайтка үөрэх управлениета иһитиннэрдэ.
РФ Үөрэҕириигэ министиэристибэтэ 2020 сыл балаҕан ыйын 2 күнүгэр 458-с №-дээх “Алын уопсай, сүрүн уопсай уонна орто уопсай үөрэх бырагырааматынан үөрэнии туһунан” бирикээһэ тахсыбыта. Саҥа бирикээскэ олоҕуран, бастакытынан, Дьокуускай куорат оскуолаларыгар 1 кылааска киирэр оҕолору сурутуу 2021 сыл муус устар 1 күнүттэн саҕаланар. Иккиһинэн, убайдара, эдьиийдэрэ үөрэнэр оскуолаларыгар киириэхтэрин сөп.
Управлениеҕа иһитиннэрбиттэринэн, 2020-2021 үөрэх дьылыгар Дьокуускай куоракка үөрэх суударыстыбаннай тэрилтэлэригэр 5630 оҕо маҥнайгы кылааска киирбит. Аны сайын 5094 оҕо уһуйааны бүтэрэр эбит. Ол эрээри, кэлиҥҥи сылларга улуустан куоракка көһөн кэлии элбээн, маҥнайгы кылааска эрэ буолбакка, уопсайынан, куорат оскуолаларыгар киирэр оҕо ахсаана үксүү турар.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).