Мөлтөхтүк саҥарар оҕолор оскуолалара тутуллуо

Ааптар: 
Бөлөххө киир:

Мөлтөхтүк саҥарар оҕолор үөрэнэр оскуолаларын тутуу саҕаланыа. 

Мөлтөхтүк саҥарар оҕолорго Дьокуускайга 120 миэстэлээх өрөспүүбүлүкэтээҕи анал (коррекционнай) оскуола-интэринээт тутуллуутун саҕалыыр туһунан иһитиннэрии СӨ тутууну уонна дьиэни-уоту кэтээн көрүү судаарыстыбаннай управлениетыгар киирдэ. Тутааччы — «АЭБ Капитал» ХЭУо.

«Бырайыакка мөлтөхтүк саҥарар оҕолору үөрэтии уратыта учуоттанна«, — диэн СӨ тутууну уонна дьиэни-уоту кэтээн көрүү судаарыстыбаннай управлениетын салайааччытын бастакы солбуйааччы Влад Пермяков иһитиннэрэр. Бырайыагынан 120 оҕо үөрэнэригэр ананар оскуола икки мэндиэмэннэнэр, уопсай иэнэ 3012,35 кв. м. Итиэннэ 100 миэстэлээх үс мэндиэмэннээх интэринээттэнэр. Интэринээт уопсай иэнэ 1816,60 кв. м. Икки дьиэ сылаас галереянан силбээһэр.

Аныгы үйэ ирдэбилигэр эппиэттиир үөрэнэр куорпуска мультимедийнэй тэриллээх кылаастар, мастарыскыайдар, успуорт саалата, 60 оҕо аһыыр остолобуойа, бибилэтиэкэ, аактабай саала, логопед, эбии дьарык, айар дьоҕуру сайыннарарга хостор баар буолуохтара. Маны сэргэ, оскуолаҕа анал көтөҕөр лииптэр көрүллэллэр. Оттон интэринээккэ утуйар хостору таһынан, медицинскэй блок, куруһуоктар ыытыллар сирдэрэ, сынньанар уонна релаксация хосторо баар буолуохтара. Дьиэ таһыгар оонньуур былаһаакка уонна успуордунан дьарыктанар сир былааннаналлар.

Мөлтөхтүк саҥарар оҕолор үөрэнэр оскуолаларын тутуу судаарыстыбаннай-чааһынай бииргэ үлэлээһин мэхэньиисиминэн олоххо киллэриллэр.

СӨ тутууну уонна дьиэни-уоту кэтээн көрүү судаарыстыбаннай управлениетын пресс-сулууспата

+1
0
+1
0
+1
0
+1
0
+1
0
+1
0
+1
0