Дьокуускайга Ленин проспегын хапытаалынай өрөмүөнэ атырдьах ыйыгар Кулаковскай уулуссатыттан саҕаланыа.
Бу туһунан Дьокуускай куорат баһылыга Евгений Григорьев мунньахха иһитиннэрдэ. Бэлиэтээн эттэххэ, тэрээһин «Куттала суох уонна хаачыстыбалаах айан суоллара» национальнай бырайыак иитинэн ыытыллар.
2021 сылтан 2023 сылга диэри Дьокуускайга Ленин проспегын өрөмүөннүүргэ Хабаров уулуссатыттан Краснояров уулуссатыгар диэри улахан кээмэйдээх үлэ ыытыллыаҕа.
«Главстрой» МКУ иһитиннэрэринэн, бырайыактыыр докумуон судаарыстыбаннай эспэртиисэтин бастакы түһүмэҕэ түмүктэммит, инженернэй чинчийии түмүгүн кулун тутар 31 күнүгэр туппуттар. Бэдэрээччит, быһа холуйан, от ыйын 1 кэрдииһигэр чопчуланыахтаах.
Евгений Григорьев Кулаковскай-Киров уулуссаларыгар үлэ ыытыллыыта сатыы сылдьар дьоҥҥо-сэргэҕэ мэһэйи үөскэтиэ суохтааҕын, дьон сылдьар суола-ииһэ табыгастаах буолуохтааҕын бэлиэтиир.
«Бэдэрээччиттэр быһаарыллыахтарыгар диэри атын кэккэ үлэлэр оҥоһуллуохтаахтар, светофордар үлэлэрин эрэсиимэ, о.д.а. быһаарллыахтаахтар. Хантараакка ороскуот учуоттаныллыахтаах. Ленин проспегын хапытаалынай өрөмүөнэ быйыл атырдьах ыйыгар Кулаковскай уулуссатыттан саҕаланыаҕа», — диэтэ.
Уу-хаар боппуруоһугар сыһыаннаан «Главстрой» МКУ суолу тутууга отделын начаалынньыга Владимир Макаров тохтоото. Кулаковскай уулуссатыгар ууну ыраастыр, хачайдыыр ыстаансыйалаах туочука баар буолуоҕун эттэ.
Маны таһынан, М.К.Аммосов аатынан ХИФУ Ботаническай саадын бэрэстэбиитэллэрэ күөх үүнээйини, сибэккини көрүү-харайыы туһунан иһитиннэрдилэр. Кинилэр бастатан туран, эрэгийиэн күнүн-дьылын уратытын учуоттаан туран, үүнээйини сөпкө уонна хаачыстыбалаахтык олордууттан саҕалыыры бэлиэтээтилэр, көрүү-харайыы боппуруоһугар тохтоотулар.
Евгений Григорьев олордуллубут мастар мантан инньэ бары тыыннаах хаалан үүнүөхтээхтэрин эттэ. «Сири-уоту көҕөрдүү үлэтэ туспа хантараагынан барыахтаах. Бэдэрээччиттэргэ олордубут мастарын үүнүүтүн түмүгүнэн көрөн төлүүр курдук оҥоруохха наада», — диэтэ уонна «Куорат хаһаайыстыбатын эксплуатациялыыр сулууспа» МКУ, ОДьКХ Департаменыгар, энергетиктэргэ куораты көҕөрдүү үлэтигэр исписэлиистэри аныырга, бу боппуруоһу болҕомтоҕо ылалларыгар соруйда. Дьокуускай куораты көҕөрдүү стратегиятыгар киллэрэргэ, ХИФУ Ботаническай саадын исписэлиистэригэр Ленин проспегын көҕөрдүүгэ сүбэлэри бэлэмнииллэригэр көрдөстө.
Дьокуускайга суол-иис үлэтигэр уонна уопсастыбаннай тырааныспарга отдел начаалынньыга Николай Старостин мунньах түмүгүнэн тутуу уонна тырааныспар инфраструктуратын управлениетын салалтатын кытары «ЯПАК» МУП бииргэ 2021 сылга уопсастыбаннай тырааныспар сылдьар быстах кэмнээх схематын оҥорбуттарын туһунан иһитиннэрдэ. Ол курдук, куорат оптуобустара Лермонтов, Поярков, Ярославскай, Орджоникидзе быысаһа турар уулуссаларынан сылдьыахтара диэтэ.
Бэлиэтээн эттэххэ, Ленин проспегын хапытаалынай өрөмүөнүн уопсай устата 2,9 км тэҥ. Үлэ сыаната 1 667 мөл.солк.. Быйыл Кулаковскай уулуссатыттан Киров уулуссатыгар диэри, 830 миэтэрэ, хабыллар учаастагын иэнэ 20 тыһ.кв.м. үлэ ыытыллара былааннанар. Ону сэргэ уотун-күөһүн, сырдатыытын, сибээс, тутуу матырыйаалын тиэйии, о.д.а. үлэлэрин туһунан этилиннэ.
Үлэ бастакы түһүмэҕин болдьоҕо САССР 100 сылыгар — 2022 сыл балаҕан ыйын 1 күнүгэр түмүктэнэрэ былааннанар. Иккис болдьоҕу 2023 сыл алтынньы 31 күнүгэр түмүктүүр былааннаахтар.
+1
+1
+1
+1
+1
+1
+1