Сылын аайы Кыайыы күнүгэр ыытыллар “Өлбөт үйэлээх полк” аахсыйа быйыл уһун тохтобул кэнниттэн дьону-сэргэни мунньуоҕа. Бу сыллааҕы аахсыйаҕа историческэй киинэлэри, байыаннай ырыалары аһаҕас халлаан анныгар күөх экраҥҥа көрдөрүөхтэрэ.
Дьокуускайга “Өлбөт үйэлээх полк” сарсыарда 10 чаастан саҕаланыаҕа. Мустубут дьон Хабаров уулуссатыттан (“Токко” маҕаһыын утары) Кыайыы болуоссатынан эргийэн, Богатырев уулуссатыгар (Дзержинскэй уулуссатыгар) диэри хаамыахтара. Тэрийээччилэр Хабаров уулуссатыгар 202-с оройуон таһыгар “Токко” маҕаһыын утары мустарга ыҥыраллар.
“Өлбөт үйэлээх полк” аахсыйаҕа ким барыта кыттыан сөп. Уопсай хаамыыга кыайан кэлбэт, быһа эпииринэн кыттыан баҕалаахтар бырайыак анал сайтыгар эбэтэр “ВКонтакте”, “Одноклассники” социальнай ситимнэр нөҥүө киирэн регистрацияны ааһыаххытын сөп.
Бу тэрээһин Арассыыйа үрдүнэн барытынан ыытыллар. Аахсыйа аан бастаан 2012 сыллаахха буолбута. Билигин тэрээһин бары эрэгийиэннэргэ, куораттарга, улуустарга барытыгар ыытыллаллар.
Аграфена КУЗЬМИНА