Дьокуускайга Крым Россияны кытта холбоспут күнүн үөрүүлээх миитининэн бэлиэтээтилэр
Кулун тутар 18 күнүгэр Комсомольскай болуоссакка Крым Россияны кытта холбоспут күнүгэр анаммыт үөрүүлээх миитиҥҥэ Ил Түмэн норуодунай дьокутааттара, өрөспүүбүлүкэ бырабыыталыстыбатын чилиэннэрэ, Дьокуускай куорат уопсастыбаннаһа кытыннылар.
Тыл эппит дьон Россияны уонна Крым Өрөспүүбүлүкэтин мэлдьи ситимнээбит үтүө үгэстэри, ону тэҥэ Севастополь оборонатыгар уонна Крым иһин кыргыһыыга кыттыбыт Саха сирин олохтоохторун ахтан-санаан аастылар.
“Крым Россияны кытта холбоспута дойду сүрүн быыбарын кытта сөп түбэспитэ бэлиэ түгэн. Түөрт сыл анараа өттүгэр Крым уонна Севастополь Россия састаабыгар икки саҥа субъект быһыытынан киирбиттэрэ. Холбоһуу тумул арыыга референдуму ыытыы кэнниттэн ситиһиллибитэ, ити түмүгэр Крым олохтоохторун 95 бырыһыантан тахсата Россия састаабыгар киирэр баҕалаахтарын биллэрбиттэрэ”, — диэн Михаил Гуляев бэлиэтээтэ. Кини маны сэргэ 19 үйэ ортотугар 42 пехотнай полка Севастополь оборонатыгар кыттан, хорсунун көрдөрбүтүн санатта.
“Россия олохтоохторо Крым уонна Севастополь олохтоохторо төрүт дойдуларыгар төннөллөрүн өйүүргэ биир санаалаахтарын уонна дойдуларыгар бэринилээхтэрин көрдөрбүттэрэ. Дьон сүрэҕэр Крым мэлдьи Россия быстыспат сорҕотунан буолара уонна бу историческай түгэн олохтонорун мөлүйүөнүнэн дьон күүппүтэ”, — диэн бу бэлиэ түгэни Анатолий Добрянцев бэлиэтээтэ.
Өрөспүүбүлүкэ уопсастыбаннай палататын чилиэнэ, “Ночные волки” мотокулууп бэрэстэбиитэлэ Виктор Копылов кинилэр уопсастыбаннай тэрилтэлэрэ онус сылын субуруччу Севастополь таһыгар дойдуга бүттүүнүгэр тэриллэр, сүүһүнэн тыһыынча көрөөччүнү түмэр байк-шоуга тэрийээччи буолан, бу дьоһун түгэҥҥэ бэйэтин кылаатын киллэрбитин туһунан эттэ.
Үөрүүлээх тэрээһини С.А.Зверев-Кыыл Уолун аатынан Саха Өрөспүүбүлүкэтин Национальнай Үҥкүү тыйаатырын солистарын толорууларыгар эҕэрдэ үҥкүү, казактар ырыаларын ансаамбылын, Хоту дойду аҕыйах ахсааннаах төрүт норуоттарын Судаарыстыбаннай тыйаатырын артыыстарын, Саха Өрөспүүбүлүкэтин Эстрада тыйаатырын артыыската Сахаайа уо.д.а толоруулара киэргэттилэр.
“Биир күн” этно-поп муусука регионнар икки ардыларынааҕы муусука бастакы куонкуруһун кыттыылааҕа, Крым Өрөспүүбүлүкэтин чиэһин көмүскээбит Гузель Муратова репертуарыттан СӨ Эстрада Судаарыстыбаннай тыйаатырын артыыһа Константин Степанов толордо.
СИА.